Çempionlar Liqasında qrup mərhələsinə gələn həftə yekun vurulacaq.

Amma “Qalatasaray”ın yer aldığı A qrupunda vəziyyət o qədər gərgin və mürəkkəbdi ki, indidən söz-söhbət baş qaldırıb. “Bavariya”nın 5-ci turda evdə “Kopenhagen”i məğlub edə bilməməsi (0:0) indiyə qədər də “Cim-Bom”un baş məşqçisi Okan Buruku narahat edir. Daha öncə “Pendikspor”la matçın ardından keçirilən mətbuat konfransında bu məsələyə toxunan Buruk Almaniyanın yüksək tirajli “Bild” nəşrinə verdiyi açıqlamada da Münhen nəhəngindən gileylənib: “Açığı, “Bavariya”nın “Kopenhagen”ə xal verməsi bizi çox məyus etdi. Münhenlilər bu mövsüm ilk dəfə heyətdə rotasiyaya əl atdılar. Matçın gedişində də onların qələbəyə can atdığı çox hiss olunmadı”.

Burukun bu sözlərinə “Kopenhagen”in təcrübəli üzvü Rasmus Falkın cavabı gecikmədi: “”Qalatasaray”ın məşqçisinin sözlərini mənə sonradan çatdırdılar. Açığı, bu sözlər mənə hörmətsizlik kimi gəldi. Həm bizim Münhendəki mübarizəmizə, həm də “Bavariya”nın oyununa hörmətsizlikdi. “Bavariya” o matçda qətiyyən istəksiz təsir bağışlamadı. Hətta ikinci hissənin gedişində onların bəzi oyunçuları ilə danışmaq istddim. Sona yaxın “onsuz da hədəfinizə çatmısız” deməyə çalışdım. Amma bir işə yaramadı. Hücumları davam etdirirdilər”. Maraqlıdı ki, “Bild” nəşri də Okan Buruka aid xəbərdə ona haqq verib! Almanlar özləri də “Bavariya”nın həmin matçda istəksiz göründüyünü vurğulayıblar. Buna sübut kimi isə ikili mübarizələrin cəmi 45 faizinin qazanılmasını göstəriblər. Əslində bu, çox incə məqamdı və “Bavariya”nı heç kim heç nədə günahlandıra bilməz. Amma fakt budu ki, münhenlilərin həmin görüşdə ÇL-in qrupunda 17 oyunluq qələbə və 38 oyunluq qol vurmaq seriyaları qırıldı. Buruk “Bild”ə verdiyi açıqlamanın davamında “biz Kopenhagendə qalib gələrək öz işimizi yerinə yetirmək istəyirik. Amma “Bavariya”ya da “Mançester Yunayted”lə qarşılaşmada böyük ümidlərim var” ifadəsini işlədib. Burukun bu məqamı qabartması təsadüfi deyil. Düzdü, “Cim-Bom” son turda “Kopenhagen”ə qalib gələcəyi təqdirdə “Old Trafford”dakı matçın nəticəsindən asılı olmadan pley-offa vəsiqə qazanacaq. Amma “Qalatasaray” qələbə qazanmasa, Əli aşından da ola bilər, Vəli aşından dar. Çünki “Old Trafford”da meydan sahibləri sevinsə və Danimarkanın paytaxtında qonaqlar qələbəyə həsrət qalsa, İstanbul nəhəngi sonuncu pilləyə yuvarlanacaq və hətta AL-dən də kənar qalacaq!