Çempionlar Liqasının sonuncu turunda A qrupunda ad baxımından ''Mançester Yunayted'' - ''Bavariya'' görüşü daha cəlbedici kimi görünsə də, intriqa baxımından əsas diqqətlər ''Kopenhagen'' - ''Qalatasaray'' matçına yönələcək.

“Football-plus.az” xəbər verir ki, çünki qalib gələn tərəf pley-offa vəsiqə qazanacaq. Bu arada Danimarka çempionunun yarımmüdafiəçisi Rasmus Falk Türkiyə çempionunun baş məşqçisi Okan Buruka cavab verib. Buruk son açıqlamasında qrup mərhələsinin 5-ci turunda ''Bavariya''nın evdə ''Kopenhagen''ə qarşı var gücü ilə oynamadığına işarə vurmuşdu. Həmin qarşılaşma bilindiyi kimi qolsuz başa çatdı. Halbuki ''Bavariya'' ''Kopenhagen''i yensəydi, son turda ''Cim-Bom''a pley-off üçün heç-heçə də kifayət edə bilərdi. Falk bunları deyib: ''Qalatasaray''ın məşqçisinin sözlərini eşitməmişdim. Bunu mənə sonradan dedilər. Açığı, bu ifadələr mənə hörmətsizlik kimi gəldi. Həm bizim Münhendəki mübarizəmizə, həm də ''Bavariya''nın oyununa hörmətsizlikdi. ''Bavariya'' həmin matçda qətiyyən istəksiz oynayan, var gücünü qoymayan təsiri bağışlamadı. Hətta ikinci hissənin gedişində düşündüm ki, onların bəzi oyunçuları ilə danışsam, geri çəkilərlər. Sonlara yaxın onlara ''onsuz da hədəfinizə çatmısız'' deməyə çalışdım. Amma bir işə yaramadı''.

ƏLİ