Gələn mövsüm Milli Hokkey Liqasında əməkhaqqı tavanı 4,2 milyon dollar arta bilər.

"Football-plus.az" xəbər verir ki, insayder Pyer Lebryun məlumatına görə, ilkin proqnozlara görə, tavan 87,7 milyon dollar təşkil edəcək. MHL-in komissarı Qeri Bettmen bir müddət əvvəl liqanın maliyyə durumunun yaxşı olduğunu və əməkhaqqı tavanının 4,5 milyon dollar artırıla biləcəyini demişdi. Xatırladaq ki, cari mövsüm üçün bu hədd 83,5 milyon dollar həcmində müəyyənləşib. Lebryunun xəbəri doğru çıxsa, onda məğləb 87,7 milyon dollara çatacaq.

MHL ilə bağlı başqa maraqlı xəbərlər də var. “Arizona” srağagün “Vaşinqton”u 6 cavabsız qolla məğlub etməklə ardıcıl 5-ci qələbəsini qazandı. Zahirən burda qeyri-adi heç nə yoxdu. Ancaq iş ondadı ki, “Arizona”nın son 5 oyunda məğlub etdiyi (“Veqas” – 2:0, “Tampa-Bey” – 3:1, “Kolorado” – 4:3 OT, “Sent-Luis” – 4:1, “Vaşinqton” – 6:0) komandalar son 5 ilin çempionlarıdı. “Vaşinqton” Stenli kubokunu 2018-ci, “Sent-Luis” 2019-cu, “Tampa-Bey” 2020-ci və 2021-ci, “Kolorado” 2022-ci ildə qazanıb, “Veqas” isə titulun son sahibidi.

Yeri gəlmişkən, “Vaşinqton”un kapitanı Aleksandr Oveçkin “Arizona” ilə oyunda da heç nə ilə yadda qalmadı. Paytaxt klubunun ulduzu qol vurmadığı oyunların sayını 7-yə çatdırdı: 38 yaşlı rusiyalı sonuncu dəfə noyabrın 19-da – “Kolambus”la oyunda (4:3) fərqlənib. Oveçkin cari mövsümdə keçirdiyi 22 oyunda cəmi 14 (5+9) xal toplayıb.

Ulduz hokkeyçinin indiki durumuna vətənində də biganə deyillər. Hokkey üzrə ikiqat olimpiya çempionu, Stenli kubokunun ikiqat qalibi Vyaçeslav Fetisov Oveçkinin “quru” seriyasına belə münasibət bildirib: “Saşa mövsümə hazırlaşıb, hər şey ola bilər. O, məsuliyyətli adamdı. Saşanın üzərində ciddi psixoloji yük var. Onun bu planda bir qədər sakitləşməsini istəyirəm. Qol duyumunun geri qayıdacağına əminəm, Aleksandr bundan sonra da komandanı arxasınca daşıyacaq. Onun və Ueyn Qretskinin rekordu ətrafında hədsiz çox söz-söhbət var. Saşaya uğur arzulayıram”.

“Tampa-Bey”in müdafiəçisi Viktor Hedman üçün “Dallas”la oyun MHL-dəki 1000-ci qarşılaşma olub. 32 yaşlı isveçli MHL-dəki bütün karyerasını 2009-cu ildən şərəfini qoruduğu “Laytninq”in heyətində keçirib. O, indiyə qədər 677 (148+529) xal toplayıb. Cari mövsümdə keçirdiyi 26 oyunda isə hesabına 25 (5+20) xal yazıb.

Başqa seçilən hokkeyçi də var. “Minnesota”nın hücumçusu Mats Zukkarello dünən “Kalqari” ilə oyunda məhsuldar ötürmə verib. Bu, 36 yaşlı hokkeyçinin MHL-də 600-cü məhsuldar hərəkəti idi. Mats MHL tarixinə turnirdə 600 xal qazanmağı bacaran ilk norveçli kimi düşdü. O, dünyanın ən güclü hokkey liqasında keçirdiyi 789 oyunda 192 qol vurub, 408 məhsuldar ötürmə verib. Zukkarello MHL-də 2010-cu ildən çıxış etməyə başlayıb, həmin vaxt “Reyncers”lə müqavilə bağlayıb. 2019-cu ilin fevralında “Reyncers” onu “Dallas”la dəyişib. Həmin ilin yayında isə norveçli azad agent kimi “Minnesota”ya keçib.

5 dekabr
Tampa-Bey – Dallas 4:0 (2:0, 0:0, 2:0)
Filadelfiya – Pittsburq 2:1 ОТ (0:1, 1:0, 0:0, 1:0)
Vinnipeq – Karolina 2:1 (1:0, 1:1, 0:0)
Monreal – Sietl 4:2 (1:0, 2:1, 1:1)
Arizona – Vaşinqton 6:0 (5:0, 1:0, 0:0)
Veqas – Sent-Luis 1:2 ОТ (0:1, 0:0, 1:0, 0:1)
6 dekabr
Baffalo – Detroyt 3:5 (0:2, 1:2, 2:1)
Kolambus – Los-Anceles 3:4 ОТ (1:0, 2:0, 0:3, 0:1)
Ottava – Reyncers 6:2 (2:0, 3:2, 1:0)
Aylenders – San-Xose 4:5 ОТ (1:1, 1:0, 2:3, 0:1)
Çikaqo – Neşvill 3:4 Б (1:0, 2:3, 0:0, 0:0, 0:1)
Kalqari – Minnesota 2:5 (0:1, 1:3, 1:1)
Kolorado – Anahaym 3:2 (1:0, 1:0, 1:2)
Vankuver – Nyu-Cersi 5:6 (2:4, 0:1, 3:1)