Xavyer Tebasın planı baş tutub. O, yenidən İspaniya La Liqasının prezidenti seçilib.

"Football-plus.az" xəbər verir ki, təcrübəli funksioner noyabrda istefaya yollanmışdı. Onun səlahiyyət müddəti dekabrın 23-də sona çatacaqdı. Tebas istefa verməklə 2024-cü ilə təyin olunan növbəti seçkinin vaxtını irəli çəkmək istəmişdi. Yerli mənbələr onun istənilən halda yenidən seçiləcəyini proqnozlaşdırırdı. Belə ki, prezident kürsüsünə yeganə namizəd elə Tebas idi. La Liqanın Seçki Komissiyası (SK) təqdim edilən yeganə namizəd olduğu üçün don Xavyerin prezident elan edildiyini açıqlayıb. Dekabrın 14-də komissiyanın iclasında mümkün müraciətlərə baxılacaq. SK-nın məlum qərarından şikayət edilməsə, Tebas rəsmən prezident elan ediləcək. Dördüncü dəfə prezident seçilən funksioner La Liqaya 2013-cü ildən rəhbərlik edir.