Xavyer Tebas İspaniya La Liqasının prezidenti vəzifəsindən istefa verib. Amma onun artıq bu postu tutmaqdan bezdiyini düşünməyin.

Əksinə, “Marca” qəzetinin yaydığı xəbərə görə, o, bu addımı yenidən prezident seçilmək üçün atıb. Tebasın istefası ilə əvvəlcə 2024-cü ildə keçirilməsi nəzərdə tutulan prezident seçkilərinin bu il təşkil olunacağı gözlənilir. 2013-cü ildən La Liqaya rəhbərlik edən Tebas seçkinin daha erkən təşkilində şəxsən maraqlı idi. Onun səlahiyyət müddəti dekabrın 26-na qədər idi. Amma istefaya yollanmaqla seçkinin bir qədər irəli çəkilməsinə nail olmaq istəyir.

Əlavə edək ki, təcrübəli funksionerin 4-cü dəfə prezident seçilmək şansı yüksək dəyərləndirilir. Belə ki, “Marka” onun seçkidə yeganə namizəd kimi qeydiyyatdan keçəcəyini iddia edir.