Ölkə futbolunda daim üzdə olan siması - bir neçə klubun formasını geyən, 2007-18-ci illər aralığında yığmanın heyətində 60 oyun keçirib 3 qol vuran Rahid Əmirquliyev hələ də qazonun ətrindən doymayıb.

Veteran futbolçu hazırda “Şahdağ Qusar”ın heyətində 2-ci liqada çıxış edir. Komandası aşağı dəstədə ilk “5-lik”də qərarlaşsa da, kubokda mübarizəni artıq başa vurub. Kapitanla həm kubokda “Qaradağ Lökbatan”dan alınan məğlubiyyət, həm də bəzi başqa məsələlər ətrafında söhbətləşdik.

- Ölkə kubokunda ”Qaradağ Lökbatan”a minimal hesabla uduzaraq mübarizədən çəkildiz. Bu haqda nə deyə bilərsən?
- Ölkə kubokunun 1-ci mərhələsində penalti seriyasında qələbə qazanaraq (“Qusar” üzərində - red.) növbəti mərhələyə adlamışdıq. İstəyərdik ki, bu turda da qalib gələrək növbəti mərhələyə keçək. Təəssüf ki, olmadı.

- Ümumiyyətlə, ölkə kubokunun yeni formatı haqda nə düşünürsən?
- Turnirin hər il bu formatda keçirilməsini istəyərdim. Çünki 1-ci və ya 2-ci liqa komandalarının elita klublarına qarşı mübarizəsi bu liqalarda oynayan gənclərdə böyük ruh yüksəkliyi yaradır. Bu onlar üçün böyük təcrübədi.

- İkinci liqa klublarının kuboka buraxılması ölkə futboluna nə verəcək?
- Bu, ölkə futbolu üçün yaxşı haldı. İkinci liqada oynayanların əksəri gənclərdi. Bu təkcə bizdə deyil, Avropada da belədi. PFL rəhbərliyinin bu addımını alqışlayıram.

- İkinci liqada Qusarın iki təmsilçisi var. Səncə, “Qusar”la “Şahdağ Qusar”ın birləşməsi, bu iki komandanın bazasında daha bir güclü klubun yaradılması daha yaxşı olmazdımı?
- Bunların birləşməsi və ya ayrılması mənə aid sual deyil. Bu haqda sual daha yuxarı səviyyəli şəxslərə ünvanlanmalıdı. Hər klubun öz sponsoru var, rəhbəri var. Mənim bu haqda fikir bildirməyim doğru deyil. Onu deyə bilərəm ki, Qusarda həmişə futbol olmalıdı. Bura böyük futbolu qaytarmaq istəyirik. Allahın izni ilə “Şahdağ Qusar”ı gələcəkdə əsas çempionatda görəcəyik.

- Canni de Byazinin millidən gedişindən sonra bu posta namizədin varmı? Səncə, komandanı yerli, yoxsa əcnəbi məşqçi çalışdırmalıdı?
- Bunu artıq neçə dəfə demişəm ki, millinin başına yerli məşqçinin gətirilməsi daha uyğundu. Fikrimcə, hər nə qədər də olsa, yerli məşqçilərimiz əcnəbilərdən pis nəticə göstərməz.

- Yəqin AFFA-nın millinin yeni baş məşqçisini müəyyənləşdirmək üçün işçi qrup yaratmasından xəbərdarsan. Bu qrupa yönəlik hansısa təkliflərin varmı?
- Bu qrupu AFFA yaradıb. Düşünürəm ki, bildikləri bir şey olduğuna görə bu addımı atıblar. Mənim bu barədə heç bir fikrim yoxdu. Sadəcə, qrupa uğurlar arzulaya bilərəm.

MİRKAMAL KAZIMZADƏ