“Qaradağ Lökbatan” 1-ci divizionun 22-ci turunda qazandığı qələbə ilə sona 4 tur qalmış çempionluğu rəsmiləşdirdi.

Komandanın bir neçə gün öncə Region Liqası təmsilçisi “Qusar”la keçirdiyi yoldaşlıq oyununda uduzması (0:1) isə hamını təəccübləndirdi.

Gözlənilməz məğlubiyyətin səbəbini öyrənmək üçün “Qaradağ Lökbatan”ın baş məşqçisi Füzuli Məmmədovla əlaqə saxladıq:

“Bu yoldaşlıq oyunu idi. Məşqçinin bir planı olur. Mən indi uşaqları yükləyə bilməzdim. Onlar böyük bir stressdən çıxıblar. Bu həftə oyunumuz olmadığına görə və komanda tonusda qalsın deyə “Qusar”la qarşılaşdıq. Uşaqlara ehtiyatlı oynamağı, zədə almamağı tapşırmışdım. “Qusar” da yaxşı komandadı. Amma biz nəticəyə oynamırdıq deyə uduzduq. Əslində bu qarşılaşma daha çox “Qusar”a lazım idi. Məndən xahiş etdilər və razılıq verdim. Heyətimiz də tam deyildi. Bəzi futbolçularımız var ki, ancaq rəsmi görüşlərdə oynadıram. Məsələn, Sabir Allahquliyev yox idi. Başqa bir neçə əsas futbolçumuz da oynamadı. Yəni hesab bizim üçün önəmli deyildi. Nəticəyə oynasaydıq, tam fərqli yanaşardıq”.

ŞAİR ABDULLA