Dünən Çempionlar Liqasının qrup mərhələsinin 5-ci turu çərçivəsində İstanbulda baş tutan ''Qalatasaray'' ilə ''Mançester Yunayted''in dueli nəfəsləri kəsdi.

“Football-plus.az” xəbər verir ki, qonaqlar matçın gedişində əvvəlcə 2:0, sonra 3:1 öndə olsalar da, Türkiyə çempionu mükəmməl geridönüş edərək 90 dəqiqəni 3:3-lük bərabərliklə tamamladı. ''Cim-Bom''un taleyi hələ də öz əlindədi. Amma pley-offa yüksəlmək üçün son turda hökmən ''Kopenhagen'' səfərində 3 xal qazanmaq tələb olunur. ''Sarı-qırmızılar'' cari qrupda artıq 10 qol vurublar. Sona hələ 1 tur qalmasına baxmayaraq komanda ÇL-in qrupunda qol sayı baxımından rekordunu təkrarlayıb. ''Qalatasaray'' 1999/00 və 2000/01 mövsümlərində qrup mərhələsini məhz 10 qolla tamamlamışdı. ''Yunayted'' isə qol buraxmaq baxımından birdən-birə iki antirekordu yeniləyib! Komanda 5 tura 14 top buraxıb. Bu, ÇL-in qrup mərhələsi üçün həm klub tarixində, həm də İngiltərə klubları arasında antirekorddu! Özü də nəzərə alaq ki, qarşıda hələ 1 tur da qalıb. Sonuncu turda rəqib ''Bavariya'' olacaq. Ümumiyyətlə, ''qırmızı şeytanlar'' bu mövsüm ilk 20 rəsmi oyuna artıq 33 top buraxıblar. Bu, komandanın son 61 ildə, yəni 1962/63-dən bu yana ən pis göstəricisidi. Başqa diqqətçəkən faktlar da var. Hakim Ziyeş 2003/04-dən bu yana Neymar (2018) və Kriştiano Ronaldonun (2009) ardından ÇL-də bir oyunda cərimə zərbəsindən 2 qol vuran 3-cü futbolçu oldu! Kərəm Aktürkoğlu isə Kriştiano Ronaldodan (2012/13) bu yana ÇL-də ''Yunayted''ə qarşı həm evdə, həm də səfərdə qol vurmağı bacaran ilk futbolçu oldu.

ƏLİ