Misli premyer-liqasında 15-ci tura yekun vurulub.

“Football-plus.az” xəbər verir ki, “Qarabağ” öz meydanında “Qəbələ”dən üstün olub - 3:0. Matçdan sonra ağdamlıların çalışdırıcısı Qurban Qurbanovun mətbuat konfransı keçirilib. Sizi onun fikirləri ilə tanış edirik:

- Yeni gələndə Juninyo tənqid olunurdu. Amma artıq qollarını vurur və vacib fiqura çevrilib. Demək olar ki, indiki Juninyo “Çaveş”də görüb bəyəndiyinizdi, yoxsa daha artığını gözləyirsiz?
- Burda daha yaxşıdı. İki il öncə də onunla maraqlanmışdıq. Sadəcə alınmamışdı. Amma o vaxtlarda oyununu izləyirdik. Əlimizdə imkan düşdü və bundan maksimum yararlana bildik. Son vaxtlar onun perfomansı pis deyil. Amma tam razı deyiləm. Həm mən, həm özü də daha yaxşı Juninyo görmək istəyir. Öz üzərində işləməlidi və daha da yaxşılaşdırılası çox elementlər var. Amma ümumən kollektivə uyğunlaşır, mental olaraq da belədir. Ölkəyə də uyğunlaşır. Nəticə baxımından razı ola bilərəm. Amma tam istədiyim Juninyo deyil.

- Patrik Andrade əvvəlki performansına yaxınlaşır?
- Ola bilər. Hər şey yaxşılığa doğru gedir. Tam uyğunlaşmağa başlayıb. İdman formasını bərpa edir. Oynadıqca daha yaxşı olacaq. Bacarıq, təcrübə onda var. Qarşıdakı matçlarda çox istərdim ki, daha yaxşı Patrik görüm.

- Rəqiblərlə xal fərqiniz artırdız. Futbolçularda rahatlaşma yarana bilər?
- Ola bilər. Sırf nəticəyə görə yox, istər-istəməz gərgin, sıx qrafikdi. O, bir az futbolçuları arxayınlaşdıra bilər. Sıx qrafiki nəzərə alaraq, məşqçilər olaraq daha diqqətli olmalıyıq ki, arxayınlıq baş verməsin. Qarşıda heç də asan oyunlarımız yoxdu. Çox vacib qrafiklə giririk. Ola bilər lki, hansısa futbolçuda bu görünməsin. Futbolçudu da, rahatlığı həmişə axtarır. Bu gün oyunun gedişatında gördüm arxayınlığı. İnsan uğur əldə etdikdə, arxayınlaşma olur. Rəqiblər bunu bağışlamır. Amma oyunun gedişində özlərini ələ ala bildilər. Məni ən çox narahat edən məqam bu və zədələrdi. Kevin Medinanın zədəsi gərgin oyunlarda daim oynaması ilə bağlıdı. Süni örtükdəki o epizod bəlkə normal ot meydanda olsaydı, daha rahat qəbul edərdi epizodu. Düzdü, qeyri-adi hərəkət oldu. Amma ot örtüyündə topu daha rahat qəbul edərdi. Bəzən elə şeylər var ki, bizdən asılı olmur.

- Yeni mərkəz müdafiəçisi transfer etmək gündəmə gəlib?
- Sırf Medinaya görə yox, ümumən hər mövqedə dəyişiklik etmək istəyirik. Ola bilər ki, belə addım ataq, komandaya mərkəz müdafiəçisi gətirək. 5-6 mərkəz müdafiəçimiz olsa da, bəzən 2 mərkəz müdafiəçisi ilə qalırıq. Ona görə belə fikrimiz var. O demək deyil ki, indikilərə güvənmirəm. İş prinsiplərimiz bunu tələb edir ki, mövqelərdə sağlam oyunçular olsun.

- Adama Diakabi və Redon Cicanın ayrılığı gözlənilə bilər?
- Hələ ki, heç bir futbolçunun gedişi gözlənilmir.