Qadınlardan ibarət futbol yığmamız Millətlər Liqasında son oyunlara çıxır. Qrupda lider olan milli bu gün səfərdə Cənubi Kiprlə, dörd gün sonra isə Bakıda Farer adaları ilə qarşılaşacaq.

Matçla bağlı komandanın əsas simalarından biri Aysun Seydiyeva ilə söhbətləşdik.

- Oyuna hazırlıq necə gedir?
- Həmişə olduğu kimi hazırlıq yüksək səviyyədə keçir. Amma bu toplanış başqalarından fərqlidi. Çünki Cənubi Kiprlə oyuna itkilərlə çıxacağıq. Bizi çətin matç gözləyir.

- Hansı oyunçular zədəlidi?
- Jalə Mənsimova sarı vərəqə cəzalısı olduğu üçün bizə kömək edə bilməyəcək. Həmçinin də Nazlıcan Parlak və Vüsalə Hacıyeva zədəlidi.

- Bakıda bu rəqiblə heç-heçə etmişdiz. Əslində qalib gəlmək şanslarımız var idi. Yığmanın Limassolda fərqli oyun göstərəcəyini demək olarmı?
- Bakıdakı matçda çoxlu qol şansımız oldu. Təəssüf ki, bəxtimiz gətirmədi. Amma inanıram ki, bu oyunda hər şey bizim xeyrimizə olacaq. Cənubi Kipr səfərindən qələbə ilə qayıtmaq istəyirik.

- Bu matçdan dörd gün sonra Farer adaları ilə qarşılaşırsız. Səncə, növbəti mərhələyə vəsiqə məsələsini Cənubi Kiprdə həll edib Bakıdakı oyuna rahat çıxmaq olarmı?
- Rahat çıxmaq demək istəməzdim. Hər iki qarşılaşma bizim üçün çox önəmlidi. İstəyirik ki, komanda olaraq bu matçlarda qələbəyə sevinək. Cənubi Kiprdə qalib gəlmək son matç ərəfəsində kollektivə yaxşı motivasiya olar.

- Millətlər Liqasında yekun hədəfiniz nədi?
- Hədəfimiz qrupdan lider kimi çıxmaqdı. Bunun üçün çalışırıq.

CAVİD ƏLİYEV