Birinci liqanın 9-cu turunda "Şamaxı"nın evdə "Karvan"a uduzması "şirlər"in çalışdırıcısı Vüqar Əsgərlinin istefasına səbəb oldu. Bölgə təmsilçisi dünən yeni baş məşqçisini də açıqladı. Bu, İdarə Heyətinin üzvü Ramiz Məmmədovdu.

“Football-plus.az” 55 yaşlı mütəxəssislə əlaqə saxlayıb.

- Təyinatınız barədə danışardız.
- Çox ani qərar oldu. Son turda "Karvan"a məğlub olandan sonra komandada baş məşqçi istefası yaşandı və məni bu posta layiq bildilər. Bilirsiz ki, mən də İdarə Heyətində işlədiyimə görə "Şamaxı"ya yad sima deyiləm. Rəhbərliklə danışdıq, razılaşdıq və komandanı götürdüm.

- "Şamaxı"nın hazırkı problemi nədi?
- Bu haqda danışmaq tezdi. Əlimizdə olan futbolçulardan razıyıq. Problemmiz yoxdu. Sadəcə, oyunçularda əskik olan yönləri təkmilləşdirməyə çalışacağıq.

- Qışda heyətə yeni futbolçular qatmağı düşünürsüz?
- Hazırda diqqətimizi komandanı inkişaf etdirməyə, çatışmayan zonaları düzəltməyə köklənmişik. Transfer məsələləri sonranın işidi.

- "Şamaxı"nı premyer-liqaya qaytaracağınıza inanırsız?
- Qarşımıza qoyulan hədəf Allahın köməyi ilə premyer-liqaya yüksəlməkdi.

- Noyabrın 30-da ölkə kuboku çərçivəsində səfərdə "Zaqatala" ilə qarşılaşacaqsız. Bu matç barədə nə deyə bilərsiz?
- Mənim üçün ev-səfər prinsipi yoxdu. Hər birimiz azərbaycanlıyıq. Ölkə daxilində oynayırıq Çempionatda meydana az çıxan futbolçularımızı bu görüşdə sınayacağıq.

- Ölkə kubokunda hədəfiniz nədi?
- Gücümüz çatana kimi irəli getmək niyyətindəyik.

CAVİD ƏLİYEV