"Bildiyiniz kimi, "Şamaxı"nın qarşısına 1-ci liqada çempion olub elitaya qayıtmaq tapşırığı qoyulub. Hazırda vəziyyətimiz istədiyimiz səviyyədə deyil. Amma baş məşqçimizin işindən narazı deyildik. "Karvan"la oyundan sonra Vüqar müəllim rəhbərliklə görüşmək istədiyini bildirdi. Görüş zamanı da nələrinsə düzgün getmədiyini, bunun da başlıca səbəbkarının özü olduğunu deyərək getmək istədiyini bildirdi. Biz də onun xahişini nəzərə alaraq, dost-yoldaş kimi ayrıldıq. Vüqar müəllimə "Şamaxı" üçün xidmətlərinə görə minnətdarlığımızı bildirdik. Amma biz tərəfdən baş məşqçinin vəzifəsindən uzaqlaşdırılması gündəm olmayıb, həmçinin son oyundakı nəticəyə görə də mütəxəssisin işindən narazı olmamışıq. Bildiyiniz kimi, artıq 1-ci dövrə bitdi. Çempionatda fasilə elə də uzun deyil. Bir həftə sonra kubok matçımız var, iki həftədən sonra isə 2-ci dövrə başlayacaq. Vaxt məhdudiyyətimiz var. Yeni baş məşqçi axtarışındayıq. Komandanın “sükanı arxasına” kimin keçəcəyinin nə vaxt aydınlaşacağı bəlli deyil 1 həftə, 10 gün, 1 ayda da yeni təyinat baş verə bilər. Hələlik komandanı məşqlərə Vüqar müəllimin köməkçiləri çıxaracaq".