14-cü turun "Səbail" - "Kəpəz" oyunu qolsuz bitdi.

"Sarı-göylər"in ən təcrübəli futbolçularından Vurğun Hüseynov uzatma dəqiqələrində meydana çıxdı. "Football-plus.az saytı yığmamızın sabiq üzvünə bir neçə sual ünvanladı.

- Həm özünün, həm də komandanın oyunu ilə bağlı fikirlərin maraqlıdı...
- Çətin oyun olacağını bilirdik. "Səbail"lə səfər oyununa ciddi hazırlaşmışdıq. Məqsədimiz ən azı 1 xal götürmək idi ki, bunu da bacardıq. Düşünürəm ki, ədalətli nəticə oldu. Oyunuma gəlincə, az oynadım. Amma qarşıdakı oyunlarda daha çox şans qazancağıma, təcrübəmlə də fayda verəcəyimə inanıram.

- Təcrübəli futbolçulardansan, bu vaxta kimi bir çox məşqçinin rəhbərliyi altında oynamısan. Necə düşünürsən, Adil Şükürov "Kəpəz"də arzulanan nəticəni verəcəkmi?
- Adil müəllim komandaya gələn gündən bizi oyunlara yaxşı motivasiya edir. Yetərincə təcrübəli, savadlı mütəxəssisdi. İnanıram ki, "Kəpəz" onun rəhbərliyi altında mövsümün sonunda layiqli yerini tutacaq.

- Azər Məmmədovla Adil Şükürovu fərqi nədi?
- Hər biri savadlı məşqçi və yaxşı insandı. Azər müəllim tək baş məşqçi yox, həm də böyük qardaş olmağı bacarır. Təbii ki, Adil hoca da qayğıkeş məşqçilərimizdəndi. Fərqlərə gəlincə, hər məşqçinin oyuna baxışı, taktiki-texniki sxemlərə subyektiv yanaşması olur. Qalan məsələlərdə Azər Məmmədovla Adil Şükürov arasında çox da fərq görmürəm.

- Ölkənin əsas komandasında baş məşqçi dəyişikliyi gerçəkləşdi. Yığmamızın sabiq üzvü və təcrübəli futbolçu kimi bu barədə nə deyərdin?
- Ümumiyyətlə, millimizdə baş məşqçi təyinatlarıyla bağlı çox danışmağı sevən biri olmamışam. Heç vaxt da “bu getməlidi, o gəlməlidi” kimi ifadələr səsləndirməmişəm. Amma De Byaziyə gəlincə, düşünürəm ki, onun getməsi labüd idi. Son çıxışında jurnalistılərimizi aşağılaması onu göstərdi ki, Azərbaycan millisində işləməyə layiq deyil. Millimizdə yaxşı, hazırlıqlı futbolçular yer alır. Deyərdim ki, hazırkı heyət güclüdü və indiki nəticədən daha yaxşısına layiqdi.

- Bundan sonra yımamızı yerli, yoxsa əcnəbi baş məşqçi çalışdırmalıdı?
- Hesab edirəm ki, artıq öz məşqçilərimizə şans verməyin vaxtıdı.

- Favoritlərin kimdi bu vəzifəyə?
- Yetərincə savadlı məşqçilərimiz var. Ad çəkməyim düz çıxmaz. Mütəxəssislərimizdən kimə şans verilsə, işinin öhdəsindən layiqincə gələcəyinə inanıram.

ABDULLA İSMAYILOĞLU