Ölkə çempionatının ilk yarısının son oyunu olan "Zirə" - "Kəpəz" qarşılaşmasını izləyənlər arasında "sarı-göylər"in idman direktoru Mehman Allahverdiyev də var idi.

Təbii ki, fürsəti qaçıra bilməzdik. Gəncə futbolunun ağsaqqalıyla komandanın "qartallar"la səfər matçı, qış toplanışı, Tərlan Əhmədovla təcrübəli futbolçular arasındakı insidentdən danışdıq.

- Öncə oyunla bağlı fikrinizi öyrənmək istərdik.
- Qələbə üçün gəlmişdik. Oyunu udmalıydıq. Qarşı tərəfin də imkanları oldu, bizim də. Əlimizə düşən fürsətləri boşa verdik. Ayzayanın yüzfaizlik qol imkanını qaçırması hamımızı dilxor etdi. Həmin imkanı qola çevirsəydik, Gəncəyə qalib yollanacaqdıq. Komandamızda cəmi bir forvard var. Şuaybu təkbaşına çox işləyir deyə yorulur. Düşünürəm ki, bir hücumçumuz da olsa, daha yaxşı çıxış edə bilərdik.

- Qış fasiləsiylə bağlı plan necədi, neçə transfer gözlənilir?
- Yanvarın 7-də Türkiyə toplanışına start verəcəyik. Transferə gəlincə, düşünürəm ki, ən azı 4 futbolçu cəlb edəcəyik. Amma bu barədə konkret baş məşqçi qərar verəcək. İstənilən halda güclənməliyik.

- Ümumilikdə "Kəpəz"in 2022-ci ildəki çıxışını necə qiymətləndirirsiz?
- Xeyli vaxtdan sonra elitaya qayıtmışıq. Mövsümün ilk yarısında pis çıxış etmədik. Əsas odu, komanda özünə gəlib, hər oyunda döyüşür, rəqiblərə başağrı olur. Elə son turda autsayderlər arasında uduzmayan, güclü rəqibindən xal qoparan da biz olduq. Düşünürəm ki, gələcəkdə daha yaxşı çıxış edəcəyik.

- Siz yalnız "Kəpəz"in veteranı yox, həm də Gəncə futbolsevərlərinin də ağsaqqalı sayılırsız. Təcrübəli futbolçularla Tərlan Əhmədovun nə intriqası var ki, bitmək bilmir?
- Vallah, biz istəməzdik ki, komanda daxilində belə münaqişə olsun. Məsələnin klubdan kənara çıxmaqla mediada gündəm olması heç də xoş deyil. Bu həddə çatacağını heç kim gözləmirdi. Rəhbərlik olaraq hər iki tərəfi barışdırmaqda və məsələni qapatmaqda maraqlıyıq. "Zirə" ilə oyuna baxmağa Əfranla Raufu da dəvət etmişdik. Sağ olsunlar, gəlib "Kəpəz"i canlı izlədilər. Həm futbolçular, həm də məşqçiylə söhbətlərimiz olub. Türkiyə toplanışına kimi yenə hər iki tərəflə danışacağıq. İnanıram ki, münaqişəyə son qoyulacaq.

- Təcrübəli futbolçular müqavilənin sonuna kimi komandada qalacaqlarını və heç yerə getməyəcəklərini bildiriblər. Onları göndərməkdə, yoxsa saxlamaqda maraqlısız?
- Bu haqda danışıqlar gedir. Görək necə razılığa gələcəyik.

- Rauf Əliyev özünü yaxşı tərəfdən göstərir və 1-ci divizionda 11 qolla bombardirlər siyahısında yer alır. Sizcə, yığmanın sabiq futbolçusunu komandaya qaytarmağın "Kəpəz"ə xeyri olmaz?
- Rauf həm ölkə çempionatında, həm millidə, həm də Azərbaycan futbolunda yetərincə iz qoymuş futbolçulardandı. Onunla yanaşı, heyətimizdə yer alan təcrübəlilərin hamısı hörmət etdiyimiz oyunçulardı. Rauf, Əfran, Elvin kimi futbolçuları Yaşar Vahabzadənin vaxtında inanıb komandaya gətirmişik. Amma indi mən desəm ki, Raufun komandaya qaytarılması fayda verər və ya verməz, bu doğru olmaz. Bütün klublarda belə məsələlərdə son söz baş məşqçinindi.

- Qış fasiləsindən sonra daha güclü "Kəpəz" görəcəyik?
- İnşallah. İnanıram ki, çempionatın ikinci yarısında daha yaxşı çıxış edəcəyik.

ABDULLA İSMAYILOĞLU