Qadınlardan ibarət şahmat yığmamız Monteneqronun Budva şəhərində keçirilən Avropa çempionatında tarixi nəticəyə imza atdı – gümüş medala sahib çıxdı.

Bu uğurla bağlı gənc şahmatçımız Gövhər Beydullayeva “Football-plus.az"ın bəzi suallarını cavabladı.

- Azərbaycan qadın şahmatında tarix yazdız.
- Son iki turnirdə komandamız 3-cü yeri tutmuşdu. Amma bu yarışda rekord göstərici oldu. 9 oyundan 7,5 xalla ikinci olduq. Adətən, 7,5 xaldan çox toplayan komandalar birinci olur. Sadəcə, Bolqarıstan qızıl medala sahib çıxdı. Əlbəttə, məqsəd çempionluq idi, amma 2-ci yer də uğurlu nəticədi. Xoşbəxtəm ki, əla oyunlar keçirdik. Komanda ruhu bizdə yüksək idi.

- Hansı oyun qızıl medal qazanmağınıza mane oldu?
- Bolqarıstanla oyun. Səhv etmirəmsə, onlar reytinq sıralamasına görə bizdən fərqli 4-cü başlayırdılar. Birinci taxtalarında dünya çempionu, ikincidə isə bu turnirin gümüş medalçısı var idi. Həqiqətən də çox güclü oyunçuları mübarizə aparırdı. Kapitanların məsləhəti ilə mən bu oyunda çıxış etmədim. Bəlkə də oynasaydım, daha yaxşı nəticə ola bilərdi. Artıq o məğlubiyyət qızıl medal şansımızın üstündən xətt çəkdi.

- Səncə, turnirin reytinq favoriti olan kişilərin uğursuzluq yaşamasının səbəbi nədi?
- Məncə, ilk turlardakı məğlubiyyətlər onlara psixoloji cəhətdən təsir etdi. Həmçinin də medal qazanmaq şansları az idi. Çünki güc toplayıb geridönüş etmək uzun zaman alacaqdı.Təəssüf ki, bunu bacarmadılar. Ancaq inanırıq ki, kişi şahmatçılarımız gələcək oyunlarda uğur qazanacaq. Bu nəticə Azərbaycanda kişi şahmatının zəifləməsi anlamına gəlmir.

- Qadın şahmatının kişiləri üstələdiyini demək olarmı?
- Son illər ölkəmizdəki qadın şahmatı daha az gözə çarpırdı. Ancaq Avropa üçüncüsü olanan sonra inkişaf başladı. Lakin demək olmaz ki, Azərbaycanda kişi şahmatı zəifdi.

CAVİD ƏLİYEV