Şahmat üzrə qadınlar arasında Azərbaycan çempionatına yekun vurulub.

"Football-plus.az" xəbər verir ki, yarışın lideri Gövhər Beydullayeva son turda Xəyallə Abdullanı məğlub etməklə xallarının sayını 5-ə çatdırıbı və karyerasında ilk dəfə Azərbaycan çempionu oldu.

Turnirin sürpriz iştirakçısı Ləman Hacıyeva bu dəfə ağ fiqurlarla Türkan Məmmədyarovanı üstələyib. Nəticədə Ləman Hacıyeva 4,5 xalla karyerasında ilk dəfə çempionatın mükafatçısı olub. L.Hacıyeva gümüş medala sahib çıxıb.

Ülviyyə Fətəliyeva qara fiqurlarla Xanım Balacayevanı məğlub edib. Yekun sıralamada 4 xalla Ülviyyə Fətəliyeva yarışı üçüncü pillədə başa vurub.

Son turda Ayan Allahverdiyevanı üstələyən ötən ilin çempionu Gülnar Məmmədova bu dəfə yarışda 4-cü olub.

Dairəvi sistem üzrə yeddi turdan ibarət çempionatın mükafat fondu 11 400 manat təşkil edib. Qalib 4000 manat pul mükafatı əldə edib.