Dünən futbol üzrə ölkə çempionatının 1-ci liqasında 9-cu tura yekun vuruldu. Yenə maraqlı və gözlənilməz nəticələrlə bitən matçların şahidi olduq. Haşiyəyə çıxaraq qeyd edək ki, bu dəfə də oyunlara azarkeş marağı az idi.

Turun ilk oyununda “İrəvan” “Difai Ağsu”nu sınağa çəkib. Aşkar favorit kimi göstərilən Qərbi Azərbaycan təmçilçisi autsayder rəqibini çətinliklə məğlub edib. Daha dəqiq desək, ilk yarıda hesab açılmayıb. Hətta ilk qolun müəllifi də qonaqlar olub. Meydan sahibləri son dəqiqələrdə ağsuluların qapısına yol tapmaqla 3 xal qazana bilib.

İkinci oyunda “Araz Saatlı” MOİK-i qəbul edib. Ordu klubunun çempionatın “zəif bəndi”nə qarşı ciddi oynayacağını yazmışdıq. Çünki Qəzənfər Abbasovun yetirmələri liderlik uğrunda mübarizədən qopmaq niyyətində deyil. Gərgin keçən matçın qalibi qonaqlar olub. İnsaf naminə deyək ki, Saatlı təmsilçisi güclü rəqibə qarşı 51 dəqiqə heç-heçə oynayıb. Bunun hansısa irəliləyişin başlanğıcı olub-olmadığını növbəti turlarda görəcəyik.

Üçüncü matçda “Mingəçevir” “Zaqatala”yla üz-üzə gəlib. “Nur şəhəri”ndən olanlar son dəqiqəyə qədər əlindən gələni əsirgəməsə də, sürpriz nəticədən yayına bilməyib. Görüş qonaqların minimal hesablı qələbəsiylə bitib. Bununla zaqatalılar turnir cədvəlində də rəqibini geridə qoyub.

“İmişli” – “Qaradağ Lökbatan” qarşılaşması həlledici mahiyyət daşıyırdı. Liderin adına aydınlıq gəlməsi baxımından matça maraq nisbətən çox idi. Tərəflər 800 azarkeş önündə baxımlı oyun göstərsə də, qalib müəyyənləşməyib. Beləliklə, heç-heçə və MOİK-in yuxarıda haqqında bəhs etdiyimiz qələbəsi “hərbçilər”i yenidən lider edib. Vurğulayaq ki, “İmişli” son iki turda özü kimi oynamır. Yəqin ki, baş məqşçi Əsgər Abdullayev bu haqda düşünməlidi.

Tura “Şamaxı” – “Karvan” oyunuyla yekun vurulub. 6 qolun qeydə alındığı matçda yevlaxlılar sevinib – 4:2. Nəticənin “şirlər” üçün “soyuq duş” effekti verdiyinə şübhə etmirik. Yüksəlişdə olan və favorit sayılan komandanın yevlaxlılara uduzması azarkeşləri narahat etməyə bilməz. Xatırladaq ki, Vüqar Əsgərlinin komandası 8-ci turda da “Zaqatala”nı üstələyə bilməmişdi – 1:1. Belə getsə, komanda çempionluq arzusu ilə erkən vidalaşacaq.

KƏNAN BAHADIR