“Sumqayıt” akademiyası istedadlı uşaqları ölkə futboluna qazandırmağa davam edir.

Əlbəttə, yaxşı futbolçu olmaq üçün mütləq çox çalışmalısan. Bu yöndə həvəsli olan azyaşlılardan biri də “Sumqayıt”ın 14 yaşlı qapıçısı Yusif Həsənovdu. Onunla futbola marağının necə yaranması, qarşısına qoyduğu hədəflər və başqa məsələlər haqda danışdıq.

– Futbola marağın necə yarandı?
– Bu sahə 6 yaşımdan diqqətimi cəlb edib. Televizorda oyunlara baxdıqca həvəsləndim. Düşündüm ki, bu idman növü ilə məşğul ola bilərəm. Atam mənə top almışdı. Evdə və ya məhəllədə oynamağa çalışırdım. Bundan sonra atam məni Masazırda yerləşən “Əlincə” futbol məktəbinə yazdırdı. Sonradan klubun adı dəyişdirildi və “Xocalı” oldu. Futbolun sirlərini mənə ilk müəllimim İlkin Haciyev öyrədib.

– Məktəbə qapıçı, yoxsa başqa mövqe oyunçusu kimi yazıldın?
– Əvvəllər müdafiənin sağ cinahında oynayırdım. Komandada qapıçı olmadığı üçün özümü bu mövqedə sınadım. Atam və müəllimim qapıçı kimi formalaşmağımda böyük dəstək göstərdi. Bakı çempionatında “Xocalı”nın şərəfini qorumuşam. Bir müddət “Qəbələ”də də olmuşam. 13 yaşlı futbolçular arasında keçirilən ölkə çempionatda iştirak etmişəm.

– Gələcəkdə qarşına hansı məqsədi qoymusan? Yəni ölkədə qapıçı kimi sözünü deyə biləcək gücü toplaya biləcəyini inanırsan?
– Ən böyük hədəfim ölkəmizi xaricdə layiqincə təmsil etməkdi. Hazırda müəllimlərimin tapşırıqlarını dəqiq yerinə yetirməyə çalışıram. Komandanın qapıçılar üzrə məşqçisi Zakir müəllim, baş məşqçisi isə Baba Əsgərovdu. İnanıram ki, onların əziyyətini layiqincə dəyərləndirəcəm.

– Ölkə çempionatında tanıdığın qapıçılardan kimi bəyənirsən?
– Atam mənə mütəmadi futboldan, xüsusilə, SSRİ çempionatında “Neftçi”nin şərəfini qoruyan Aleksandr Jidkovdan danışır. İnternet üzərindən onun oyunlarını izləyirəm. “Sabah”ın qapıçısı Yusif İmanovu da çox bəyənirəm. “Yutub” vasitəsilə Kamran Ağayevin oyunlarına da baxmışam. Məncə, mükəmməl qapıçı olub.

– Hazırda “Sumqayıt”ın U-14 komandasının şərəfini qoruyursan. Çempionat necə gedir?
– Turnir cədvəlində ikinci yerdəyik. Çalışırıq ki, müəllimlərin tapşırıqlarını yerinə yetirək və bütün oyunları qələbə ilə başa vuraq. Komandalar bizə qarşı ikiqat güc sərf edir. Akademiyada bizə bütün lazımı şərait yaradılıb. Öhdəliyimiz isə baxımlı futbol oynamaq, həm müəllimlərimizi, həm də valideyinlərimizi sevindirməkdi. Fürsətdən istifadə edib, mənim üçün əziyyət çəkən, futbolun sirlərini öyrədən müəllimlərimə dərin təşəkkürümü bildirirəm. Eyni zamanda “Qəbələ”də olduğum dönəmdə əziyyət çəkən qapıçılar üzrə məşqçilər olmuş Elçin Rzayev və Oruc Quliyevə də minnətdaram.

KƏNAN BAHADIR