Ölkəmizdə basketbol idman növü ötən ildən inkişaf etməyə başaldı. Ölkə çempionatı təşkil olundu, yeni klublar yaradıldı, legioner oyunçular gətirildi. Bu da Azərbaycanda basketbola marağın artmasına gətirib çıxardı.

"Football-plus.az" xəbər verir ki, bu sahəyə həvəs göstərənlərdən biri də tanınmış aktrisa Ülfət Bəşirdi. Onunla əlaqə saxlayaraq basketbolla bağlı söhbətləşdik.

- Basketbola marağın nə vaxtdan yaranıb?
- 6-cı sinifdə oxuduğum vaxt dərsimizə bir məşqçi daxil oldu və dedi ki, məktəbimizdə basketbol dərsləri açılır. Mən də hər sahədən nəsə öyrənməyi sevən adam olmuşam, həm də o dövrdə "High School Musical” (“Ulduzlar komandası”) adlı basketbol filmi gedirdi. Düşündüm ki, bu da mənim üçün işarə ola bilər. Ona görə bu dərnəyə qoşulmağı qərara aldım. İlk dərsdə anladım ki, basketbol əsl mənim oyunumdu. Bədənim həm fiziki, həm də ruhi cəhətdən bu idman növündən qidalanır. Məktəb dövründə üç il bu sahə ilə məşğul oldum.

- Bəs həmin vaxt basketbol matçlarını izləyirdin?
- Əlbəttə, bu sahə ilə məşğulsansa, artıq peşəkar səviyyədə olan matçlara baxmalısan. Mən də MBA-nı izləməyə başladım.

- Sevdiyin basketbolçu varmı?
- Təbii ki, var. Dünyasını dəyişmiş “Qara Mamba” ləqəbli Kobe Brayantı çox sevirəm. Allah ona rəhmət eləsin. Əla oyunçu idi. Azərbaycanda isə bu idman növü ötən ildən məşhurlaşmağa başladı. Bunu eşidəndə çox xoşbəxt oldum. Ötən mövsüm bacardığım qədər bütün oyunlara getməyə çalışırdım. Favoritim "Neftçi" idi.

- Dostluq etdiyin basketbolçular varmı?
- Mən insanlarla çox yaxşı münasibət qurmağı bacaran biriyəm. Ötən mövsüm bir çox legionerlə ünsiyyətim var idi. Hələ də dostluğumuz davam edir. "Xırdalan"dan İsmayıl Əliyev, "Cəlilabad"da çıxış edən Levan Qoqaladze, ötən mövsüm “Neftçi”də çıxış edən Andrey Uklin, Emil Mirzoyev, Davit Lomidze və hazırda “ağ-qaralar”da forma geyən Aleksey Kitayev ilə əlaqələrim var. Hətta Davit Lomidzenin həyat yoldaşı ilə də rəfiqəyik.

- Özünü basketbol məşqçisi kimi yoxlamaq fikrin olub?
- Levan Qoqaladze yayda mənimlə əlaqə saxladı və dedi ki, Ülfət, ökənizdə azərbaycanlı uşaqlar üçün üçgünlük basketbol kampları açmaq istəyirəm. Əlbəttə, mən də bizim uşaqların inkişafı naminə buna razı oldum. Məşqçiləri ABŞ, İtaliya və Gürcüstandandan dəvət etmişdik. Çox maraqlı oldu. 60-a yaxın uşaq bu kursdan keçərək sertifikat aldı. Hətta “Neftçi”nin üzvü Aleksey Kitayevin övladları da bizim dərnəyə qoşulmuşdu. Kampdan sonra uşaqlardan, valideynlərdən razı qaldıqları barədə fikirlər eşitdim. Mənim də bu işdə bir payım olduğuna görə xoşbəxtəm.

- Səncə, yaxşı basketbolçu olmaq üçün nələrə fikir vermək lazımdı?
- Çox intizamlı olmalısan. Qəbul etdiyin qidalara həmişə diqqət yetirməlisən, öz üzərində çalışmalısan, həyat tərzinə fikir verməlisən. Mən də belə adamları çox sevirəm.

- Baketboldan başqa hansısa idman növü ilə maraqlanırsan?
- Futboldan tutmuş bir çox idman növü ilə məşğul olmuşam. Ancaq özümü “Fly Yoqa” idman növündə tapmışam. İki ildi bu sahə ilə məşğulam. Hətta kişilər üçün də dərslər keçirəm. Burda özümü çox rahat hiss edirəm. “Fly Yoqa” əzələlərimizi elastik edir, tonusda saxlayır. Həmçinin də bel ağrılarından azad oluruq. Ayda iki dəfə dostlarla, legionerlərlə yığışıb basketbol oynayırıq.

CAVİD ƏLİYEV