Kim deyirsə ki, Azərbaycanda istedadlı futbolçular yoxdu, yalan danışır.

Sadəcə, onları üzə çıxaran, sonrakı inkişafı üçün yol açan mexanizm yoxdu. Bu üzdən çoxlu istedadlı uşaq itib-batır. Lap elə tovuzlu Murad Hüseynov kimi. 2005-ci ildə futbola başlayan yeniyetmə qısa müddət sonra “Barselona”nın akademiyasına seçilir. Amma tale onun üzünə gülmür. İndi isə bu gənc paytaxtda mühafizəçi işləyir. Həyat tarixçəsini Muradın öz dilindən eşidək...

- Murad, lap əvvələ qayıdaq. Futbola necə və harda başladın?
- Bu idman növü sevirdim. Həddən artıq maraq göstərirdim. Bu səbəbdən də futbolçu olmaq qərarına gəldim. Allah valideynlərimə cansağlığı versin. Atamın dəstəyini зox hiss etdim. 2005-ci ildən Hikmət Nəsirov mənim karyeramda böyük rol oynadı. Allah ona rəhmət etsin. Hikmət müəllimin sayəsində futbola gəldim. Tovuzda məktəbə yazıldım. Beləliklə, futbolçu olmaq yolunda ilk addımlarımı atdım.

- Deyilənə görə, Tovuzda akademiyada çıxış edən zaman “Barselona”dan səni istəyiblər. Lakin atan keçidinə icazə verməyib. Həmin hekayəni səndən dinləmək maraqlı olar.
- Bəli! Doğrudu. “Barselona” akademiyasına seçimlər var idi.Tovuzdakı məşqçilərimə təşəkkür edirəm. Onların sayəsində bura sevilərək dəvət aldım. Məşqçilərim mənə düzgün hazırlıq keçməsəydilər, bunu bacarmazdım. Həmin vaxt “Barselona”dan gələn məşqçilər məni seçdilər. Onda yaşım az idi. Ailəm getməyimə icazə vermədi. Mən də onların fikrinə hörmətlə yanaşdım. Onda bu qərarı verdik. Xeyirlisi belə imiş...

- Səninlə birgə Budaq Nəsirov da “Barselona”ya seçilib. Necə futbolçu idi?
- Bəli, Budaq Nəsirov da mənimlə birgə seçilmişdi. Gələcək vəd edən futbolçu idi. O, yaxşı futbolçu olduğunu isbat etdi. Sonradan “Sportinq”ə transfer olundu. Həqiqətən də yaxşı oyuçu idi.

- Atan niyə səni buraxmadı? Akademiyadan əsas komandaya yüksələcəyinə inanmadı?
- Xeyr! Problem bu deyildi. Atam mənə güvənirdi. Sadəcə, uşaq idim. Buna görə ailəm icazə vermədi.

- Bu hadisədən sonra karyeranı necə davam etdirdin?
- Bu məqam futbolçu olmaq istəyimə mane olmadı. Sonradan Tovuzda çıxışıma davam etdim. “Turan Tovuz”, “Bakı”, “Zirə”, “Neftçi”, “Şüvəlan” kimi klublarda da çıxış etmişəm.

- Necə oldu ki, karyeranı bitirdin?
- 2020-ci ildə “Turan Tovuz”da karyeramı bitirdim. Həmin dövrdə 1-ci divizionda çempion olduq. Koronavirusa görə 2-ci dövrə keçirilmədi. Maddi imkansızlıqdan karyeramı bitirmək qərarına gəldim.

- Barselonaya getsəydin, həyatın necə olardı?
- Hamının xəyalıdı ki, “Barselona”nın akademiyasında oynasın. Bəli, bəlkə də həyatım başqa cür olardı. Hər işdə bir xeyir var.

- İndi nə işlə məşğulsan?
- Hazırda Bakıdayam. “Landau school”da mühafizəçi işləyirəm.

- Nə yaxşı məşqçi olmaq haqda düşünməmisən?
- Açığı, bu haqda düşünməmişəm. Mənim üçün futbolçu olmaq gözəl, möhtəşəm hiss idi. Yeniyetmələrə bir məsləhətim var: arzularınızın arxasınca getməyə çalışın.

İLKİN SULTANLI