Zaha bu göstəricidə Messidən sonra ikincidi
“Qalatasaray”ın bu yay böyük ümidlərlə heyətinə qatdığı Uilfrid Zaha Türkiyə mətbuatına açıqlamalar verib.
"Football-plus.az" xəbər verir ki, İstanbul nəhəngi ilə 2026-cı ilə qədər müqaviləsi olan təcrübəli vinger indiyə kimi 15 rəsmi matçda 805 dəqiqə forma geyib və 5 qol, 1 məhsuldar ötürməlik performans sərgiləyib. 31 yaşlı futbolçu bunları deyib:
“Fanatlarımız sadəcə möhtəşəmdi. Amma hələ ki, tam adaptasiya olunduğumu deyə bilmərəm. Hər ötən gün özümü daha da inamlı hiss edirəm. Fikrimcə, “Qalatasaray”lılar əsl Zahanı ikinci dövrədə izləyəcəklər. Burda hər kəs mənə yardım etməyə çalışır və komandada tam bir ailə ab-havası var. Burda keçirdiyim hər gün “Qalatasaray”a gəlməklə çox düzgün addım atdığı göstərir. Çempionluq mübarizəsi çox həyəcanverici şəkildə davam edir. “Fənərbaxça” ilə derbini səbirsizliklə gözləyirəm. Onları məğlub edə bilsək, psixoloji üstünlük də bizim tərəfimizə keçəcək”.
Yeri gəlmişkən, Zaha ilə bağlı bir maraqlı xəbəri də diqqətinizə çatdıraq. “Theanalyst” adlı futbol statistikasına həsr olunmuş sayt son 10 mövsümdə “böyük beşlik” ölkələrinin çempionatlarında ən çox driblinq edən futbolçuların siyahısını müəyyənləşdirib. Bu mövsümkü göstəricilər nəzərə alınmayıb. Siyahıya Lionel Messi başçılıq edir. “Qızıl top”un səkkizqat qalibi son 10 mövsümdə “Barselona”nın heyətində La Liqada və PSJ-nin heyətində Liqa-1-də ümumilikdə 2586 driblinq edib. İkinci pillədə isə məhz Zaha qərarlaşıb. Kot d`İvuarlı ulduzun aktivində 2081 driblinq var. Zaha bu müddətdə Messi ilə birlikdə 2000 driblinq həddini keçən iki futbolçudan biridi! Siyahıda digər pillələrdə Neymar (1987), artıq karyerasını başa vuran Eden Azar (1582) və Rahim Sterlinq (1522) qərarlaşıb.
Digər xəbərlər
