Bilindiyi kimi “Beşiktaş”ı bataqlıqdan çıxarmaq vəzifəsi Rza Çalımbaya tapşırılıb.

“Football-plus.az” xəbər verir ki, bu, təcrübəli mütəxəssisin İstanbul nəhəngindəki ikinci dönəmidi. O, daha öncə “ağ-qaralar”ı 2005-ci ildə yanvardan oktyabra qədər olan müddətdə çalışdırmışdı. Bu arada 2004-06-cı illərdə “Beşiktaş”da forma geymiş Xuanfran vətəni İspaniyada qatıldığı bir podkastda məhz elə Çalımbayın dönəminə aid maraqlı bir etirafı ilə gündəmə gəlib. “Qartal” 2005/06 mövsümünə Visente Del Boskenin başçılığı altında başlamışdı. Amma məhşur ispaniyalı mütəxəssisin Türkiyə macərası çox qısa çəkmiş və nəticədə onu Çalımbay əvəzləmişdi. Tam adı Xuan Fransisko Qarsiya olan və “Beşiktaş”dan başqa “Levante”, “Valensiya”, “Saraqosa”, “Ayaks”, AEK kimi klublarda top qovan Xuanfran bunları deyib: “Del Boskeyə qarşı komandada çox böyük bir hörmət var idi. Düzdü, onun dönəmi cəmi bir neçə ay çəkdi. Amma o ayrılarkən komandada hətta bəzi oyunçular ağlayırdı. Del Boske ayrılmadan öncə məni otağına çağırdı və ”böyük ehtimalla məndən sonra bir yerli məşqçi ilə anlaşacaqlar. Sən də artıq ehtiyat oyunçuya çevriləcəksən. Bu işlərin necə qurulduğunu özün çox gözəl bilirsən. Oynamasan belə səndən xahişim budu ki, mənim dönəmimdə olduğun qədər peşəkar olasan. Heç nəyə etiraz etmə və baş verənlərə qarşı səsini çıxarma. Necə lazımdısa, elə də davran” dedi. Onun bu sözlərini heç vaxt unutmayacam”. Maraq üçün bildirək ki, Xuanfran Del Boskenin dönəmində “Beşiktaş”ın keçirdiyi 25 rəsmi oyunun 18-də oynamaq şansı qazandı və 1033 dəqiqə meydanda oldu. Amma Çalımbay gəldikdən sonra o, ikinci dövrədə yalnız 1 oyunda 8 dəqiqə şans qazandı. Hazırda 47 yaşı olan Xuanfran həmin mövsüm 1041 dəqiqə ərzində 1 qol, 2 məhsuldar ötürməlik performans ortaya qoymuşdu.