“Mançester Yunayted”in yeni həmsahibi peyda olub. “Omega Advisors”un təsisçisi Leon Kupermen klubun səhmlərinin 2 faizini alıb.

“Mirror” qəzetinin məlumatına görə, biznesmen səhmlərin 2 faizi üçün 15,7 milyon avro ödəyib. 80 yaşlı Kupermenin sərvətinin 2,4 milyard avro olduğu ehtimal edilir. O, Nyu Yorkda yerləşən “Omega Advisors” şirkətinin qurucusudu.

Xatırladaq ki, daha əvvəl INEOS-un sahibi Cim Retkliffin klubda 25 faiz pay almaq istədiyi haqda məlumat yayılmışdı. Həmçinin onun MY-də futbol əməliyyatlarına tam nəzarət edəcəyi gözlənilirdi. Ancaq indi yerli mənbələr Kupermen ilə Retkliffin İngiltərə nəhənginin mövqeyini yaxşılaşdırmaq üçün birgə çalışacağını ehtimal edirlər. Komanda hazırda İngiltərə premyer-liqasında keçirdiyi 12 oyun 21 xalla 6-cı yeri tutur.

Yeri gəlmişkən, “Yunayted” rəhbərliyində daha bir dəyişiklik baş verib. Riçard Arnold baş direktor vəzifəsini tərk edib. Onun səlahiyyətlərini müvəqqəti Patrik Stüart yerinə yetirəcək.