Bir neçə gün əvvəl İlon Mask “Mançester Yunayted”in səhmlərini alacağı ilə bağlı öz “tvitter” səhifəsində paylaşım etmişdi.

Amma o, bir neçə saat sonra bunun bir zarafat olduğunu bildirmişdi. MY-yə həqiqətən də sahib çıxmaq istəyən biznesmen var.

Böyük britaniyalı milyarder Cim Redkliffin “Yunayted”i almaq niyyətində olduğu barədə “Sky Sports” məlumat yayıb. O, satışa çıxarılacağı halda başlanğıc üçün klubun səhmlərinin bir hissəni almağa hazırdı. Son günlər mətbuatda Qleyzerlər ailəsinin MY-yə yeni sərmayə qoymağı planlaşdırdığı və səhmlərin kiçik bir hissəsini satmağı düşündüyü haqda xəbərlər yayılır.

69 yaşlı Redkliff İngiltərənin ən varlı adamıdı. O, “Ineos Group Ltd” kimya şirkətinin baş direktoru və “Ineos Grenadiers” velosiped komandasının sahibidi. Redkliff 2019-cu ildə “Nitsa”nı 100 milyon avroya alıb. O, həmçinin İsveçrənin “Lozanna” klubunun sahibidi.

Yeri gəlmişkən, “Yunayted”in azarkeşlərinin “səbir kasası daşıb”: onlar etiraz aksiyası keçirməyə hazırlaşırlar. Yerli mənbələrin məlumatına görə, fanatlar belə addım atmaqla klubun sahibi Qleyzerlər ailəsinə etiraz edəcəklər. Onlar aksiyanı premyer-liqanın 3-cü turunun “Liverpul”la bazar ertəsinə təyin olunan matçdan əvvəl keçirəcəklər.

Xatırladaq ki, azarkeşlər artıq bu ay bir neçə dəfə MY-nin sahiblərinə qarşı kiçik aksiyalar təşkil ediblər.