Türkiyə yığması ilə bağlı yeni xəbərlər var.

Baş məşqçi postunda dəyişikliyə gedən və Ştefan Kuntsla yollarını ayırandan sonra Vinçentso Montella ilə anlaşan qardaş ölkənin komandası AÇ-2024-ün seçmə mərhələsi çərçivəsində oktyabrın 12-də Osiyekdə Xorvatiyanın qonağı olacaq. Oktyabrın 15-də isə “ay-ulduzlular” Konyada Latviyanı qəbul edəcək. Noyabrdakı yığma pəncərəsində Türkiyənin seçmə mərhələdə cəmi bir oyunu nəzərdə tutulub.

Türklər seçmə mərhələyə noyabrın 21-də səfərdə Uelsə qarşı oyunla yekun vuracaqlar. Noyabrın 18-də isə qardaş ölkənin səfərdə Almaniya ilə yoldaşlıq oyununda qüvvəsini sınayacağı dəqiqləşib! Görüş paytaxt Berlində yerləşən məşhur “Olimpiaştadion”da keçiriləcək. Bu, Türkiyə ilə Almaniyanın tarixdəki 22-ci qarşılaşması olacaq. Bu komandalar arasında buna qədər 13-ü rəsmi, 8-i özəl olmaqla baş tutan 21 oyunda bundestimin qələbə sayında böyük üstünlüyü var – 14:3.

Daha 4 qarşılaşma heç-heçə başa çatıb. Türkiyə ilə Almaniya sonuncu dəfə 2020-ci il oktyabrın 7-də Kölndə yoldaşlıq oyununda üz-üzə gəlmiş və həmin vaxt 3:3-lük bərabərlik qeydə alınmışdı. Noyabrın 18-dəki qarşılaşma eyni zamanda Yulian Naqelsmannın Almaniyanın başında keçirəcəyi ilk ev oyunu olacaq.

Bu arada Montellanın köməkçilərinin adına, nəhayət, aydınlıq gəlib. Burak Yılmaz və Nuri Şahindən istədiyi cavabı almayan Türkiyə Futbol Federasiyası məşqçilər korpusuna Səlcuk Şahini gətirib. Futbolçu kimi uzun illər (2003-15) “Fənərbaxça”da çıxış etməklə yaddaşlarda iz buraxan, eləcə də 2003-də Konfederasiyalar Kubokunda bürünc medallar qazanan Türkiyə yığmasının heyətində yer alan 42 yaşlı Şahin 2021-dən bəri “İstanbul BŞ”də köməkçi məşqçi kimi çalışırdı. Bundan başqa, Montellanın köməkçiləri arasında onun həmyerlisi, məşqçi karyerasının əvvəllərindən bu yana onunla birlikdə olan Daniele Russo da yer alacaq. Məşqçilər korpusunda rəqiblərin təhlilinə görə Massimo Krivellaro ilə Okan Aydıner, futbolçuların fiziki durumuna görə isə Pyerpaolo Polino və Vural Durmuş cavabdehlik daşıyacaq. TFF-nin qapıçılar üzrə məşqçi seçimi də diqqəti çəkib. Bu vəzifəni “Adana Dənirspor”da çalışan Ozan Özərkan və “Eyupspor”da çalışan Əmrah Karakovan icra edəcək. Onlar yalnız yığmanın oyunları zamanı düşərgədə olacaqlar. Başqa vaxt isə öz klublarındakı işlərini davam etdirəcəklər.

Sonda Türkiyə yığmasının qarşıdakı oyunlar üçün dünən açıqlanan heyətinə nəzər salaq. Montellanın açıqladığı ilk heyətdə iki debütant gözə dəyir. Söhbət “Adana Dəmirspor”un qapıçısı Ərtaç Özbirlə “Yuventus”un gənc üzvü Kənan Yıldızdan gedir. Almaniyada doğulan və “Bavariya”nın yetirməsi olan Yıldız ötən ildən etibarən “Yuve”nin şərəfini qoruyur. Daha öncə Türkiyənin U-17 və U-21 yığmalarında forma geyən 18 yaşlı yarımmüdafiəçi ilk dəfə əsas yığmaya dəvət alıb. Özbirə gəlincə, o, daha öncə “Kasımpaşa”, “Yeni Malatyaspor”, “Gənclərbirliyi”nin şərəfini qoruyub və ötən ildən bəri Adana təmsilçisinin uğurları üçün çalışır. Bu mövsüm 7 rəsmi oyunda forma geyən və bunların 4-də qapısını toxunulmaz saxlayan əlcək sahibinin 33 yaşında ilk dəfə yığmaya dəvət alması maraq doğurur. Onu da bildirək ki, “Adana Dəmirspor” tarixində ilk dəfə yığmaya birdən-birə 3 futbolçu göndərib.

Sonda 28 nəfərlik siyahını diqqətinizə çatdırırıq:

qapıçılar – Altay Bayındır (Mançester Yunayted), Doğan Ələmdar (Trua), Ərtaç Özbir (Adana Dəmirspor), Uğurcan Çakır (Trabzonspor); müdafiəçilər – Fərdi Kadıoğlu, Samet Akaydın (hər ikisi “Fənərbaxça”), Əbdülkərim Bardakcı, Kaan Ayhan (hər ikisi “Qalatasaray”), Ərən Elmalı (Trabzonspor), Zəki Çəlik (Roma), Cenk Özkacar (Valensiya), Merih Dəmiral (Əl-Əhli), Ozan Kabak (Hoffenhaym), Rıdvan Yılmaz (Reyncers); yarımmüdafiəçilər – İsmayıl Yüksək, İrfan Can Kahveci (hər ikisi “Fənərbaxça”), Kərəm Aktürkoğlu (Qalatasaray), Əmrə Akbaba, Yusuf Sarı (hər ikisi “Adana Dəmirspor”), Kənan Yıldız (Yuventus), Berkan Kutlu (Cenoa), Hakan Çalhanoğlu (İnter), Orkun Kökçü (Benfika), Salih Özcan (Borussiya D), Yunus Akgün (Lester); hücumçular – Cenk Tosun (Beşiktaş), Bertuğ Yıldırım (Renn), Barış Alpər Yılmaz (Qalatasaray).