"Sabah" bəzi oyunlarda məhz Murad Musayevin mənfi təsiri nəticəsində məğlub olub”
Futbol üzrə ölkə çempionatında hakimliklə bağlı çatışmazlıqlar aktuallığını qoruyur.
Aşağı dəstələr bir yana, Misli premyer-liqasında belə vəziyyət ürəkaçan deyil. İlk 12 turdan sonra iki klub - "Sabah" və "Turan Tovuz" oyunlarda ədalətin təmin edilməməsiylə bağlı etiraz bəyanatı yayıb. Hətta Masazır təmsilçisinin baş məşqçisi Murad Musayev "3 ildi Azərbaycandayam, hakimliyin səviyyəsi yüksəlmək əvəzinə tənəzzül edir" deyib.
"Football-plus.az" olaraq, hakimlərin fəaliyyəti və rusiyalı mütəxəssisin sözləri haqda mütəxəssis fikrinə ehtiyac duyduq. Aslan Kərimovun saytımıza dedikləri:
"Öncəliklə Murad bəyin sözləriylə razı deyiləm. Çox güman, ona verilən qırmızı vərəqələrə görə belə danışır. Onun taktiki savadına şübhəylə yanaşmıram. Lakin sinirlərinə hakim ola bilməyən mütəxəssislərdəndi. Məncə, ona verilən cəzaların hamısı yox, bəziləri yerindədi. Təcrübəli olsa da, emosional cəhətdən çatışmazlıqları çoxdu. Məni yanlış anlamasınlar. "Sabah"ın hazırda kritik dönəmdən keçdiyini bilirəm, amma reallıqları danmaq olmur. "Tələbələr" bəzi oyunlarda məhz Musayevin mənfi təsiri nəticəsində məğlub olub. Elə matçlar var ki, orda baş məşqçisinin texniki zonada olması vacibdi. Amma onu çox vaxt cəzalı olduğuna görə yerində görmürük. Bu da futbolçuların meydandakı performansında problem yarada bilir. Hakimlik səviyyəsinə gəlincə, bütünlüklə tənqid etmək doğru olmaz. Məncə, ümumi nəticə 50-nin 50-yədi. Düşünürəm ki, VAR sisteminin düzgün tətbiqində problem yaşayırıq. Xüsusilə ofsayd xəttinin çəkilməsi və hakimlərin epizodları təhlil etməsi tam qaydasında deyil. Onları başa düşürəm. Bu mövsüm gənc ədalət təmsilçilərinin sayı artıb. Bu, yeni və daha keyfiyyətli dövrün başlanğıcıdı. Deməzdim ki, tənəzzülə doğru gedir. Sadəcə, bir müddət ciddi səhvlərin şahidi olacağıq. Ümid edirəm ki, yaşanacaq problemlər oyunların nəticəsinə və klubların hədəflərinə mənfi təsir etməz. Ümumiyyətlə, bir müddət səbirli olmaq lazımdı".
KƏNAN BAHADIR
Digər xəbərlər
