“Əl-İttihad” baş məşqçi Nunu Eşpiritu Santunu istefaya göndərib.

"Football-plus.az" xəbər verir ki, Səudiyyə Ərəbistanı klubunun mətbuat xidmətinin məlumatına görə, portuqaliyalı mütəxəssislə müqaviləyə xitam verilib. “The Athletic” qəzeti onun qovulmasına yalnız komandanın uğursuz çıxışının səbəb olmadığını yazıb. Santunun kapitan Kərim Benzema ilə münaqişə yaşaması da istefa qərarına təsir edib. İngiltərə qəzeti “Əl-İttihad”ın Asiya Çempionlar Liqasının qrup mərhələsində “Əl-Quva”ya (İraq) məğlubiyyətdən sonra Eşpiritu Santu ilə Benzema arasında mübahisə yaşandığını iddia edir. Onların hətta bir-birinə qarşı təhqiramiz ifadələr işlətdikləri də vurğulanıb.

49 yaşlı Eşpiritu Santu “Əl-İttihad”ı 2022-ci ilin iyulundan çalışdırırdı. O, komandaya Səudiyyə Ərəbistanı çempionluğunu (2022/23) və ölkə superkubokunu (2023) qazandırıb.