Famil Xəlilov: “Uşaqların demək olar ki, yarısı zədəlidi” - AÇIQLAMA
Bu gün Qəbələdə vacib oyun var.
“Football-plus.az” xəbər verir ki, “qırmızı-qaralar”ın U-19 komandası Çempionlar Liqasının 2-ci mərhələsində “Olimpiakos”la qarşılaşacaq.
Görəsən, kollektiv matça necə hazırlaşır? U-19-da ab-hava necədi? Oyunöncəsi ətraflı məlumat almaq üçün baş məşqçi Famil Xəlilovla danışdıq:
“Motivasiyamız çox yüksək səviyyədədi. Oyunun məhz noyabrın 8-nə, yəni Zəfər Gününə təsadüf etməsi bizə əlavə ruh yüksəkliyi verir. Şəhidlərimiz qədər olmasa da, əvəzsiz qələbəyə biz də idman sahəsində nəsə qatmaq istəyirik. Bu yöndə futbolçularla danışmışıq və görüşün önəmini bu baxımdan hər birinə aşılamışıq. Düzdü, ilkin hədəfimiz bir mərhələ adlamaq idi. Lakin indi daha böyük uğur qazanmaq üçün fürsət var. İmkanı maksimum dəyərləndirmək üçün əlimizdən gələni edəcəyik. Heyətə gəlincə, hələ ki dəqiqləşməyib. Sözün açığı, uşaqların, demək olar ki, yarısı zədəlidi. Həkimlər çalışır ki, hamısını oyun gününə qədər bərpa etsin. Amma onların əvvəlki gücündə oynayıb-oynamayacağını yalnız meydanda görəcəyik. Qrafikimiz çox sıxdı. 3 gündən bir oyun olur. Şübhəsiz, belə çətinliklər komandanı yorur və daha sonra bərpa prosesi uzun zaman alır”.
Famil bəyin “Olimpiakos” haqda fikirləri isə belədi:
“Rəqib çox güclüdü. Müdafiə xətti etibarlıdı, hücumda isə sürətli futbolçuların xidmətindən yararlanırlar. Son iki oyununu diqqətlə təhlil etmişəm. Heyət keyfiyyətli futbolçulardan qurulub. Əlbəttə, bu, onların qüsursuz olması demək deyil. Boşluqlar da verirlər. Matçda məhz bu çatışmazlıqlardan istifadə etmək lazımdı. Daha əvvəl də dediyim kimi, az səhv edən qalib gələcək”.
KƏNAN BAHADIR
Digər xəbərlər
