Dünən 1-ci liqanın 7-ci turun çərçivəsində diqqət çəkən oyunlardan biri də İmişlidə keçirildi.

Yerli komandanın "Zaqatala" üzərindəki darmadağını izləyənlər arasında Futbolun İnkişaf Fondunun icraçı direktoru Tural Piriyev də var idi. Onunla 1-ci liqa təmsilçilərinə sponsorların cəlb olunması barədə söhbət etdik.

- Tural bəy, bugünkü matç haqda fikirləriniz maraqlıdı...
- Biz yaşıl meydanda gedən oyuna baxmaqdan daha çox oyuna qədər olan proseslər, klubların inkişafı və başqa məsələlər ilə məşğuluq. Tərəfsiz olsam da, maraqlı və məhsuldar oyun izlədik.
- Bəs 1-ci liqada inkişaf varmı?
- Ayrı-ayrı klublarda inkişaf nəzərə çarpır. Yaxından əlaqədə olduğumuz, əməkdaşlıq etdiyim komandalarda irəliləyiş görürük. Bizim vasitəmizlə sponsorlar cəlb olunan klublar gələcəyə doğru uğurlu addımlar atmaqdadı. Elə "İmişli"də və "Turan Tovuz"da hazırda dayanıqlı inkişaf görürük. Yeni düşüncəli, futbola marağı və dəstəyi olan sahibkarların varlığı bizi sevindirir. Onların ölkə futboluna faydaları var.
- "İmişli" hazırda sponsoru olan və çempionluğa iddialı klubdu. Bölgə təmsilçisində vəziyyət yaxşıdımı, yoxsa görüləcək çox iş var?
- Maliyyə, infrastruktur baxımından görüləcək iş çoxdu. Klubun baş sponsorunun olması hələ hər şey demək deyil. Biz İmişlidə başqa sahibkarlarla da görüşlər təşkil edir, onları yerli komandaya dəstək olmağa çağırırıq. Əlavə "Biznes klub" adlı məhsulumuz var. Bu məhsul sponsor ola bilməyəcək, amma başqa cür faydalı olacaq. Adı çəkilən məhsulu həm "İmişli"yə, həm də "Zaqatala"ya təqdim etmişik. Əməkdaşlıqda maraqlıdılar.
- 1-ci liqada vəziyyəti ağır olanlar çoxdu. Başqa klublara da sponsor dəstəyi ilə bağlı iş aparırsızmı?
- Çempionatda region klublarının sayı çox olduğundan, hamısına eyni vaxtda hərtərəfli kömək etmək mümkünsüzdü. Daha çox əməkdaşlıq etdiyimiz komandalara kömək etməyə çalışırıq. Amma digər klublara da ümumi dəstək verməyi düşünürük və qarşıda bu məsələylə bağlı tədbir də həyata keçirəcəyik.
- Stadionların vəziyyəti haqda nə deyərdiz?
- Təbii ki, 1-ci liqa təmsilçilərinin stadionları elita standartlarıyla ölçülə bilməz. Stadionlar müxtəlif qurumların balansında olduğundan klublar da fərqli şərtlərlə icarəyə götürürlər. Ümumiyyətlə, bu çempionatda stadionlarla bağlı görüləcək çox iş var. Elə İmişlidəki stadionun özündə də müəyyən işlərin həyata keçirilməsinə rəğmən, peşəkarlaşma tam təmin olunmayıb.

ABDULLA İSMAYILOĞLU