"İmişli" - "Zaqatala" oyununu izləyənlər arasında Musa Qurbanov da var idi. Veteran futbolçu, "Zaqatala"nın sabiq prezidenti darmadağına görə məyus olmuşdu.

- Musa müəllim, oyunla bağlı fikirləriniz maraqlıdı...
- Danışılacaq çox şey yoxdu. Bu gün meydan sahibləri layiqli qələbə qazandılar. Bu münasibətlə "İmişli"ni və Əsgər müəllimi təbrik edirəm. "Zaqatala"ya gəlincə, çox zəif çıxış etdi. Görünür, komanda hələ mövsümə hazır deyil.

- "Zaqatala" daim iddiasıyla seçilib. Bəs indi birinci liqada ən zəif bəndlərdən biri olması nə ilə bağlıdı?
- Səbəblər az deyil. İlk növbədə komandadan çox futbolçu getdi. İkincisi, onların yerinə gələn futbolçular həm heyətə gec qoşuldu, həm də hələlik özlərini doğrulda bilmirlər. Üçüncüsü, klubda maliyyə sıxıntısı var. Məhz buna görə də istədiyimiz futbolçuları cəlb edə, peşəkarlaşma yolunda zəruri inkişaflara nail ola bilmirik.

- Bəs sponsor axtarışı davam edirmi?
- Davam edir. Hazırda klub prezidenti olmasam da, doğma rayonumun təmsilçisi üçün maliyyə dayaqları axtaranlar sırasındayam. Elə bu gün İmişli stadionunda Futbolun İnkişaf Fondunun icraçı direktoru Tural Piriyevlə də söhbət etdik. Sağ olsunlar, onlar da zəngin iş adamlarını futbolumuza cəlb etməyə çalışırlar. Ümidimizi itirməməli, sponsor axtarışını davam etdirməliyik.

- Bəs Zaqatala İcra Hakimiyyəti kluba yardım əlini uzadırmı?
- Onlara da çox müraciət etmişik. Cavabları da bu olub ki, hazırda sizə maliyyə yardımı göstərməyə imkanımız yoxdu. Amma mənəvi dəstəklərini əsirgəmirlər. Onlar da klubla bağlı iş adamları ilə söhbət edib, edirlər də. Vaxtaşırı məni də iş adamları ilə görüşdürürlər. Amma bir az əvvəl qeyd etdiyim kimi, hələlik nəticə yoxdu.

ABDULLA İSMAYILOĞLU