Oyunun ilk dəqiqələri sakit məcrada keçdi.

İlk hissədə hər iki komandanın ifasında o qədər də təhlükəli hücumlar izləmədik. Düzdü, ara-sıra naxçıvanlıların vingerləri Kuzmanoviçlə Rodriges "Qarabağ" müdafiəçilərini narahat etməyə çalışırdı. Lakin "köhlən atlar"ın arxa xətti etibarlı oyun nümayiş etdirirdi. "Qarabağ"ın hücum xətti isə sönük təsir bağışlayırdı.

Fasilədən sonra ilk 15 dəqiqə o qədər maraqlı keçmədi. İşlərin qaydasında getmədiyini görən Qurban Qurbanov birdən-birə 4 dəyişiklik etdi. Azər Bağırov da cavabında meydana 3 futbolçu buraxdı. Artıq "Qarabağ" meydanda dominantlıq edirdi. Naxçıvanlılar isə əks-hücumlara bel bağlamışdı. Azər Bağırovun bu sistemi alındı. 73-cü dəqiqədə ağdamlılar müdafiədə səhvə yol verdi. Orxan pressinq edərək Bədavinin yanlış ötürməsindən sonra topu ələ keçirdi. Hücumçu Lukanı geridə qoyaraq topu qapıya göndərdi. Onun zərbəsi dirəkdən qayıtdı. Hücumun davamında Bədavi Orxana qarşı qaydanı pozdu. Əliyar Ağayev bir az gözlədikdən sonra fitini səsləndirdi. VAR-dan təsdiq gələndən sonra zərərçəkən zərbəni dəqiq yerinə yetirdi. Qoldan sonra “köhlən atlar” hücuma atıldı. Bu da onların müdafiə xəttində boşluqlar yaradırdı. Oyunun sonlarında Muxtar Respublika təmsilçisi qonaqları əks-hücumda yaxaladı. Tural topu ələ keçirərək bir qədər reyd etdikdən sonra Maşikeyə ötürmə verdi. Forvard boş qapını nişan almaqda çətinlik çəkmədi. Düzdü, bu epizodda Ağdam təmsilçisinin oyunçuları Turalın Yankoviçə qarşı qaydanı pozduğunu bildirdi. Lakin Əliyar Ağayev mərkəzi göstərdi. Bu, matçda sonuncu qol olmadı. 90+7-ci dəqiqədə Diakabinin ötürməsindən sonra Juninyo qapıçı ilə təkbətəkdən qalib ayrıldı. Lakin “köhlən atlar”ın bundan artığına gücü çatmadı. Beləliklə, bu mövsümün əsas kəşfi “Araz-Naxçıvan” daha bir sensasiyaya imza atdı, çempionu da devirdi.

Gözdən qaçmadı
* Start fitindən öncə tanınmış diktor Ramiz Qafarovun ölümüylə bağlı birdəqiqəlik sükut elan olundu.
* Futbolçular və hakimlər sükut mərasimindən xəbərsiz idi. Çünki diktor Pərviz Musayev prosesi elan edəndə oyunçular meydanın mərkəzində dayanmamışdı. Onları sonradan Əliyar Ağayev mərkəzə dəvət etdi.
* Stadionun elektron reklamlarında "Araz-Naxçıvan"ın və PFL-in sponsorlarından əlavə "Qarabağ"a dəstək olan şirkətlərin adları da göstərilirdi.
* Oyunu izləyənlər arasında yığmanın baş məşqçisi Canni de Byazi və Arif Əsədov da var idi. Gənclər və ddman naziri Fərid Qayıbov da matça stadiondan tamaşa edirdi.
* "Araz-Naxçıvan" hesabı açandan sonra bəzi məqamlarda topdaşıyanlar "dəri kürə"ni gec verirdilər. Belə epizodların birində Qurban Qurbanov onlara "bir az tez olun" dedi.
* Oyun bitən kimi Riçard Almeyda ilə Bədavi Hüseynov 4-cü hakim Rəşad Əhmədova etiraz etdi.

İLKİN SULTANLI