Dünən "Sky” otelində növbəti mövsümdən 1-ci liqada çıxış edəcək "Difai Ağsu" klubunun təqdimat mərasimi keçirildi.

Əvvəlcə Azərbaycanın dövlət himni səsləndirildi, ardından Vətən müharibəsində canından keçmiş şəhidlərin xatirəsi birdəqiqəlik sükutla yad olundu. Daha sonra klubun prezidenti Asəf Məlikov "Difai”nin yaranması tarixi haqda danışdı. PFL-in vitse-prezidenti Aslan Şahgəldiyev də 1-ci liqada debüt edəcək komandadan danışdı. Əməkdar artist Elşən Rüstəmov klubun himninin sözlərini səsləndirdi. Gənclər və İdman Nazirliyinin aparat rəhbəri Amil Xudiyev, AFFA nümayəndəsi Elçin Məmmədov da tədbirdə çıxış edərək kluba uğurlar arzuladı.
Klub prezidenti Asəf Məlikov “Baku City Hospital”ın rəhbəri Bayram Qorçiyevlə sağlamlıq mövzusunda, "Kapital Security"nin nümayəndəsi Fuad Nəcəfovla isə oyunlarda təhlükəsizliyin təmin olunması ilə bağlı müqavilə imzaladı. Ağsuluların oyun və məşq geyim formaları da təqdim olundu. Komanda səfərdə ağ, evdə isə qırmızı və qara rəngli forma ilə çıxış edəcək. Daha sonra qonaqlara və media nümayəndələrinə kiçik top və formalar hədiyyə olundu.
Fürsətdən istifadə edib "Difai"nin baş məşqçisi Paşa Əliyevlə ayaqüstü söhbətləşdim.

- Paşa bəy, bu gün klubunuzun təqdimatı oldu. Fikirləriniz maraqlıdı...
- Hamımız üçün uğurlu, düşərli olsun. İnanaq ki, "Difai" adına layiq çıxış edəcək və bu yolda əlimizdən gələni edəcəyik.

- Heyətlə bağlı nə deyə bilərsiz?
- Sərəncamımızda əsasən gənclərdi. Daha çox onlara güvənəcəyik. Məqsədlərimizdən biri də gəncləri inkişaf etdirmək və onların təcrübə yığması sayəsində komadanın onurğa sütununu qurmaqdı.

- Bəs təcrübəli oyunçulardan kimlər var?
- Premyer-liqa təcrübəsi olan Məhsun Qənbərli və Fuad Məmmədzadənin də xidmətindən yararlanacağıq. İnanıram ki, onların təcrübəsi bizə çox kömək edəcək.

- Bəs legionerlərə ehtiyac duyacaqsızmı?
- Hələlik legionersiz davam edəcəyik. Amma gələcək üçün təcrübəli və güclü legionerlərə ehtiyac ola bilər.

- Çempionatda qarşınıza hansı hədəf qoyulub?
- Konkret hədəf yoxdu. Biz döyüşkən, mübariz komanda formalaşdırmaqla bütün rəqiblərə başağrısı olmaq və maksimum irəli getmək istəyirik.

ABDULLA İSMAYILOĞLU