Xəbər verdiyimiz kimi, FİBA Avropa Kubokunun müntəzəm çempionatına vəsiqə qazanan “Sabah” D qrupunun ilk oyununda səfərdə Monteneqro təmsilçisi “Mornar”a məğlub oldu - 75:80 ( 22:22, 17:21, 13:16, 23:21).

Oyundan sonra “tələbələr”in kapitanı Endər Poladxanlı da "Football-plus.az"a açıqlamasında məğlubiyyətin əsas səbəbi kimi hakimin düzgün qərarlar verməməsini və əsas oyunçulardan Desmond Ronaldın meydandan kənarlaşdırılmasını göstərdi. Görəsən, həqiqətən hakim səhvləri nəticəyə, oyunun axarına təsir edib? Bu suallar ətrafında “bayquşlar”ın idman direktoru Elşən Yusubovla söhbətləşdik.

- Kapitan Endər Poladxanlı “Mornar”a məğlubiyyətin əsas səbəbini hakimlərin qərəzləri qərarlarında gördü. Bu iddianı bölüşürsüzmü?
- Endərin fikrində həqiqət var. Bəli, oyunun əvvəlində əsas oyunçumuzun meydandan qovulması kollektivə təsir etdi. Lakin məğlubiyyəti bu nüanslarla da bağlamaq istəmirəm. Çünki dediklərim bəhanə olar. Hakim bizə qarşı qərəzlidisə, oyunçuların belə hallarda təmkinli olması vacibdi. Bizim də səhvlərimiz oldu. Rəqibə 6 qayda pozuntusu və 19 cərimə atışı qazandırdıq. Bunları qeyd etməyimiz vacibdi.

- Sizə görə komandanın hansı zonasında problemlər var?
- Maşallah olsun, uşaqlardan razıyıq. Çox perspektivli, səviyyəli basketbolçularımız var. Ancaq hansı zonanın daha zəif olduğunu deyirsizsə, onda “bir nömrə” və mərkəz nöqtələrinin daha da güclənməsini istəyərəm.

- “Sabah”ın avrokuboklarda və ölkə çempiontındakı hədəfləri nədi?
- Bilirsiz ki, artıq “Sabah”ın avrokuboklarda bura kimi irəliləməsi səs-küy doğurub. Mənə görə, artıq tarix yazmışıq. Lakin hədəfimiz Avropada Azərbaycan basketbolunu tanıtmaqdı. Bu idman növünü ölkədə brendə çevirmək istəyirik. Əlbəttə, hədəf sona kimi getməkdi.

- Növbəti turda evdə Türkiyə təmsilçisi “Baxçaşəhir”lə qarşılaşacaqsız. Bu oyundakı şanslarınız nə qədərdi?
- Azarkeşlərimizin önündə oynayacağımız üçün layilncə mübarizə aparmaq niyyətindəyik. Düzdü, rəqib bizim kimi ilk oyunda uduzsa da, güclü kollektivdi. Məqsəd qalib gəlməkdi.

CAVİD ƏLİYEV