"İrəvan" "Şamaxı" ilə oyunda əsas oyunçularının xidmətindən məhrum idi ki, bunun da səbəbini bilirsiz.

Maaşını ala bilməyən əsas heyət oyunçuları meydana çıxmır. “Şamaxı” ilə oyunda kapitan sarğısı komandaya yeni qoşulan təcrübəli Elvin Yunuszadənin qolundaydı. “İrəvan”ın 1:3 uduzduğu oyundan sonra onunla söhbətləşdik.

- "İrəvan" heç də yaxşı günlərini yaşamır. Buna rəğmən, bu gün kapitan sarğısı ilə komandanı meydana çıxardın. Həm oyun, həm də klubdakı xoş olmayan olaylarla bağlı nə deyərdin? 
- Hansı çətin vəziyyətdə olduğumuz hamıya məlumdu. Belə haların olmasını istəməzdim. Heyətimizdəki əksər futbolçular oyuna çıxmaqdan imtina etdilər. Ona görə də kasad heyətlə matça başladıq. Bu gün sırf futbol xatirinə və komanda dağılmaması üçün oynadıq. 

- Bu gün ağır yükün altına girdin. Həm oyuna azlıqda başladız, həm də komandanı kapitan kimi güclü rəqib qarşısına çıxardın...
- Bəli, çox çətin oldu. Bildiyimiz kimi, "Şamaxı" 1-ci liqada çempionluğa oynayan komandadı, heyətində premyer-liqa təcrübəsi olan oyunçular çoxdu. Buna rəğmən, komanda yoldaşlarım meydanda xarakter göstərdi, döyüşdük. Ən azı bir qol vurmaqla darmadağından qaçdıq. Çoxları 5-6 və daha çox qol buraxmaqla fiasko yaşayacağımızı gözləyirdi. Düşünürəm ki, heyətlə bağlı kəsiri aradan qaldırsaq, bu uşaqlar döyüşüb uğursuzluqdan çıxacaq. 

- Etiraz edən komanda yoldaşlarınla bir sırada olmamağının səbəbi nədi? 
- Onların klubdan üz çevirməklə bağlı öz səbəbləri var. Bu barədə çox şey danışmaq da düz deyil. Futbolçuları nə qınaya, nə də dəstək verə bilərəm. Mənim durumum fərqlidi. Komandaya iki gündü qoşulmuşam. Hələlik özümə qarşı haqsızlıq, qanunsuzluq görməmişəm. 

- Belə başa düşdüm ki, "İrəvan"da qalmaqda maraqlısan? 
- Dediyim kimi, komandaya yenicə qoşulmuşam. Bir ilə yaxın futbolsuz qalmışdım. Hələ oynamaq gücüm var və karyeramı davam etdirməkdə qərarlıyam. 

- Yəni sənin üçün əsas maddiyyat yox, futbol oynamaqdı?
- Səmimi deyim ki, hələlik maaş almamışam.  Bunun da səbəbi, yuxarıda dediyim kimi, kluba yeni qoşulmağımla bağlıdı. Suala gəlincə, hazırda puldan çox oynamaq haqda düşünürəm.
 
- Səncə, “qiyamçı” futbolçular qayıdacaqmı? 
- Bu barədə nəsə deyə bilmərəm. Amma çalışmaq lazımdı ki, hazırkı xoşagəlməz vəziyyətdə çıxaq. Bunun üçün də klub rəhbərliyi əlindən gələni etməli, futbolçular da onlara inanıb irəli baxmalıdı...

ABDULLA İSMAYILOĞLU