"Qəbəbə" son iki turda “doğma divarlar” arasında məğlub olub. “Səbail” önündəki son dəqiqə qolu ilə məğlubiyyəti bəlkə də qəbul etmək mümkündü. Ancaq 10-cu turda “Araz-Naxçıvan”dan alınan 1:4 hesablı darmadağın...

Həmin oyunda meydan sahiblərinin qapıçısı Rəşad Əzizli də zəif təsir bağışladı. "Football-plus.az" saytı bölgə təmsilçisinin kiperiylə uğursuzluqlar barədə danışdı.

- Rəşad, komandan son oyunlarda uğursuzluğa məruz qalır. Səbəb nədi?
- Bunu ancaq bəxtsizliklə əlaqələndirərdim. Son iki oyunda, əsasən də “Səbail"lə matçda meydanda biz “ağalıq etdik”, amma heç cür son nöqtəni qoya bilmədik.

- "Araz-Naxçıvan"la oyunda komandan 4 qolla üzüldü. Vurulan qollardan ikisində acizliyin göründü...
- Acizlik deməzdim, amma zərbə çox güclü idi. Həmçinin top bir qədər fərqli trayektoriya cızdı. Düzdü, çıxarmalıydım. Amma alınmadı.

- Futbol ictimaiyyəti, azarkeşlər hazırda "Qəbələ"nin qapı xəttini çox qınayır. Buna münasibətin?
- Dediyinizlə razı deyiləm. Əksinə, ictimaiyyət və azarkeşlər mənə dəstək verir. Düşünmürəm ki, komandamızın qapı xəttində ciddi problemlər var. Sadəcə, şansızlıq, bəxtsizlik var.

- Qapıda Atanqana dayanıb səhvlər edəndə deyirlər ki, Rəşada şans verilməlidi. Sən də “çərçivə”yə keçəndə və uğursuzluq olanda deyirlər ki, başqa qapıçı tapılmalıdı...
- Səhvlər və uğursuzluq kimi nəyi nəzərdə tuturlar?

- Hədsiz çox və kuryoz qollar buraxmağınızı…
- Təbii ki, qapıçının işi seyv etməkdi. Amma “qapıçı mütləq bütün topları çıxarmalıdı” qaydası da yoxdu, eynilə qapıya hər zərbə qolla nəticələnmədiyi kimi. Kuryoz qollara gəlincə, hər qolkiperin başına bu gələ bilər.

- Necə hesab edirsən, "Qəbələ"yə daha bir qapıçının transferinə ehtiyac varmı?
- Xeyr, bunu ehtiyac görmürəm. Klub rəhbərliyi, məşqçilər korpusu komandadakı qapıçılara güvənir, onlardan narazılığı yoxdu. İnşallah, qarşıdakı oyunlarda gözəl oyunumuzla bunu sübut da edəcəyik.

- Demək istəyirsən ki, qapı xəttində rəqabət yetərincədi?
- Bəli.

- Uğursuzluğa nə vaxt son qoyacaqsız?
- Biz məşqlərdə bütün gücümüzlə çalışırıq. Hər oyuna da qələbə üçün çıxırıq, sadəcə, bəxtsizlik bizdən əl çəkmir. Amma qarşıdakı oyunlarda daha yaxşı çıxış etməklə qara zolaqdan çıxacağımıza inanıram.

ABDULLA İSMAYILOĞLU