"Naxçıvanda olmağımdan çox məmnunam. Bu diyarda futbolu çox sevirlər. Buna görə də yerli azarkeşlər də bizə dəstəyi əsirgəmirlər. 7 tur ərzindən daha çox inkişafımız gözə çarpır. Bu gün qələbələri sıralamağımız nə qədər xoş olsa da, bir o qədər də narahatlıq doğurur. Çünki bu futbolçularda rahatlığa səbəb ola bilər. Bu yöndə son dərəcə diqqətli olmalıyıq. Artıq rəqiblərimiz də bizə qarşı fərqli taktikayla oynayırlar. Yəni, müdafiədə sıx qapanaraq, sürətli əks-hücumlarla yaxalamağı planlaşdırırlar. Bu da bizə çətinlik yaradır. Çünki komanda şəklində müdafiə olunanlara qarşı çox güc sərf edirsən. "Zirə-2" və "Turan Tovuz-2" ilə matçlarda da çox güc sərf etdik. Hər 2 komanda bizə qarşı güclü müqavimət göstərdi. Həmin oyunlarda əlimizə düşən bir çox fürsətləri dəyərləndirə bilmədik. Rəqiblərimizi sürətli əks-hücumda yaxalayanda son nöqtəni qoymaqda çətinlik çəkirik. Bir az şanssızlıq da olur. Sadaladığım çatışmazlıqları aradan qaldırmağa çalışacağıq. Ümumilikdə komandamın oyunundan və nəticələrdən razıyam".

"Əslində, həmin epizodda səhvin başlanğıcı İv Lüsyenin meydanı düzgün görə bilməməsi idi. Səhv ötürmə etdi ki, rəqib əks-hücuma çıxdı. Bu zaman Xəyal son çarə olaraq qayda pozuntusu etdi. Bəlkə də bu əks-hücumun qarşısı kobudluqla alınmasaydı, rəqib qol da vura bilərdi. Ona görə də nə futbolçumuzun üzərinə gedik, nə də qınadıq".