“Arsenal” “Sevilya” üzərindəki səfər qələbəsi sayəsində zirvəyə qayıtdı.

“Football-plus.az” xəbər verir ki, ilk yarıda bəlkə həm də yağışın təsiri ilə gərgin mübarizə, amma sönük oyun izlədik. Artetanın komandası cüzi ərazi üstünlüyünə malik olsa da, hücumda yaradıcılıq çatmırdı. Əndəlüslər də öz növbəsində yaradıcı oyun göstərə bilmirdi. Fasiləyə az qalmış rəqiblər hərəyə bir təhlükəli vəziyyət yaratdı. Ən-Nəsiri yaxşı imkandan yararlana bilmədisə, Martinelli komandasını irəli çıxardı. Emosional yüksəliş yaşayan “topçular” 2-ci hissəyə də yaxşı başlayaraq dərhal fərqi artırdı. Gözlənildiyi kimi, “Sevilya” qalan vaxtda böyük qüvvə ilə irəli atıldı. Qudelin zərbəsi sayəsində hətta fərqi azaltmaq da mümkün oldu. Ancaq “Sevilya” Dieqo Alonsonun rəhbərliyi altında ilk məğlubiyyətdən qaça bilmədi. Əndəlüslər yalnız topların daha yaxşı fərqinə görə PSV-dən öndədi. “Arsenal” isə bu tur heç-heçə edən “Lans”ı arxada qoydu.

Necə gözləyirdiksə, elə də oldu. “Lans” – PSV oyununda hədsiz çox mübarizə, amma az qol vəziyyəti var idi. Fransa komandası oyuna fəal başlasa da, ardından topa və təşəbbüsə yiyələnən PSV ilk yarıdakı ən real qol vəziyyətini yaratdı. Losano 28-ci dəqiqədə topu dirəyə vurdu.
Komandalar 2-ci hissədə daha gümrah təsir bağışladı. Bunun nəticəsi kimi qollar da vuruldu. 54-cü dəqiqədə cərimə meydançası xaricindən effektli zərbə vuran Bakayoko niderlandlıları irəli çıxardı. Ancaq cəmi 11 dəqiqə sonra Vai bu qolun əvəzini çıxdı. Qarşılıqlı hücumlar şəraitində davam edən oyunda başqa qol olmadı. 1:1 B qrupunda dolaşıq vəziyyəti saxladı. 2-ci pillədə qərarlaşan “Lans” izləyicilərindən 3 xal öndədi. Bu qrupda bütün mübarizə irəlidədi.

1. Arsenal 3 2 0 1 7-3 6
2. Lans 3 1 2 0 4-3 5
3. Sevilya 3 0 2 1 4-5 2
4. PSV 3 0 2 1 3-7 2
8 noyabr: Arsenal – Sevilya, PSV – Lans.
Oyundan sonra
Mikel Arteta, “Arsenal”ın baş məşqçisi: “Qələbə qazandığımıza görə çox sevinirik. Son 10 ildə Avropada burda qələbə qazanmağı bacaranların sayı o qədər də çox deyil. Komandamın oyunu, xüsusən də ilk 60-65 dəqiqəqə çox xoşuma gəldi. Ona görə ki, həmin zaman kəsiyində istədiyimiz kimi oynadıq. 2:0 önə çıxandan sonra üçüncü qolu da vurmalıydıq. Bunun üçün imkanlarımız da oldu. Bunu bacarmadıq, rəqib isə ilk təhlükəli vəziyyətdə fərqləndi. “Sevilya”nın zəngin təcrübəsi var, rəqib özünəinamlıdı, bu üzdən son dəqiqələrdə müdafiə olunduq. Məğlubiyyətdən daha çox dərs almaq olur, nəinki qələbədən. “Lans”la oyun tam başqa xarakterdə keçmişdi”.

Serxio Ramos, “Sevilya”nın müdafiəçisi: “Təəssüratım belədi ki, bütün gücümüzü meydanda qoyduq və özümüzü nədəsə qınaya bilmərik. Fasiləyə az qalmış qol buraxmaqda bəxtimiz gətirmədi. Bu qol bizə mənəvi zərbə vurdu, reaksiya vermək çətin idi. Ardından ikinci qolu da buraxdıq, evdə iki qol buraxmaq isə vəziyyəti ağırlaşdırır. Ancaq cavabımız pis deyildi. Çempionlar Liqasında kiçik detallar çox şeyi həll edir. Qalan oyunlar ərəfəsində daha çox şey öyrənməli və mükəmməlləşməliyik”.

Peter Bos, PSV-nin baş məşqçisi: “Nəticəyə görə məyusam, ancaq oyuna görə yox. Oyunun müəyyən bölümlərində dominantlıq və hadisələrin axarına nəzarət etdik. Ancaq uğursuz bölüm də oldu ki, onda qol buraxdıq. Həmin an bizi müdafiə olunmağa məcbur etmişdilər, həqiqətən bir müddət çətinlik çəkdik”.

Kevin Danso, “Lans”ın müdafiəçisi: “Bu oyunda qalib gəlməyimizi çox istəyirdim, hədəfimiz qələbə idi. Ancaq oyunun ən yaxşısı üçün mükafata və qoldan sonra oyuna dönə bilən komandama görə çox qürur duyuram”.

Fakt
“Arsenal” 2016-cı il dekabrın 6-dan bəri ilk dəfə Çempionlar Liqasında səfərdə qələbə qazandı. “Topçular” həmin gün “Bazel”i səfərdə 4:1 hesabıyla məğlub etmişdi.