B qrupu
Lans – Arsenal 2:1 (1:1)
Lans (Fransa): Samba, Qradit, Danso, Medina, Frankovski, Əbdül Səməd, Mendi (Diuf, 73), Maşado (Agilar, 81), Sotoka, Tomasson (Füljini, 73), Vai (Said, 73).
Arsenal (London, İngiltərə): Rayya, Tomiyasu, Zinçenko (Uayt, 70), Rays, Edeqor (Nketia, 80), Haverts (Smit-Rou, 70), Saka (Vieyra, 34), Jezus, Trossar (Nelson, 70).
Qollar: Jezus, 14 (0:1). Tomasson, 25 (1:1). Vai, 69 (2:1).
Vərəqələr: Əbdül Səməd, 90. Jezus, 90 – sarı.
Hakim: Marko Quida (İtaliya).
3 oktyabr. Lans. 37040 tamaşaçı.
oyunun statistikası
9 (3) qapıya (“çərçivə”yə) zərbə 12 (6)
3 künc zərbəsi 5
4 ofsayd 0
8 qayda pozuntusu 10
1 (0) sarı (qırmızı) vərəqə 1 (0)
32 topa sahibolma (faizlə) 68

"Football-plus.az" xəbər verir ki, Fransa çempionatında autsayderlər sırasında qərarlaşan “Lans” ÇL-də gözlənilməz nəticələrlə yadda qalır. İlk turda “Sevilya”dan xal alan Hayzın komandası bu dəfə evdə “Arsenal”ı məğlub etməklə sensasiyaya səbəbkar oldu. Cəsarətli oynayan meydan sahibləri qələbəyə layiq idi. Çox güman, erkən qola ümid edən Fransa klubunun start təzyiqi nəticə vermədi. Qonaqlar isə ilk təhlükəli vəziyyətdən yararlana bildi. Tomasson kobud səhvə yol verməklə topun Sakaya düşməsinə, o isə Jezusun fərqlənməsinə şərait yaratdı. Cəmi 11 dəqiqə sonra tablodakı rəqəmlər eyniləşdi – qolda kobud səhv edən Tomasson günahını hesabı bərabərləşdirməklə yudu. Bundan sonra oyun bir qədər sakit xarakter aldı. Ancaq fasilədən dərhal sonra Trossar qonaqları irəli çıxara bilərdi, sadəcə, qapıçı ilə dueldən məğlub ayrıldı. Bir də hissənin ortalarında oyunda canlanma yarandı. Əbdül Səmədin zərbəsindən sonra top toru yandan silkələdi, qonaqların cavab hücumunda Tomiyasu qapını nişan aldı, Samba yenə “Lans”ı xilas etdi. “Topçular” tezliklə bu imkan əldən verdiyinə görə məyus oldu. “Arsenal”ın müdafiəçilərinin cərimə meydançasının mərkəzində gözdən qaçırdığı Vai topu küncə göndərdi. Arteta dərhal oyuna yeni qüvvə qoşdu. Smit-Rou və Nelson imkanları boşa verəndən sonra aydın oldu ki, “Lans” bu əzmkar qələbə sayəsində qrup lideri olacaq. “Arsenal” isə hələ bu qrupun favoriti statusunu doğrultmalıdı.

PSV – Sevilya 2:2 (0:0)
PSV (Eyndoven, Niderland): Benites, Teze, Ramalyo (Bella-Koçap, 82), Boskalyi (Pepi, 82), Dest, Tillman, Sxuten, Verman (Saibari, 71), Bakayoko (Losano, 71), De Yonq, Lanq.
Sevilya: Nülann, Navas (Xuanlu, 73), Qudel, Ramos, Pedrosa (Akunya, 73), Fernando (Sou, 66), Rakitiç, Okampos (Bade, 87), Suso (Torres, 66), Lukebakio, Ən-Nəsiri.
Qollar: Qudel, 68 (0:1). De Yonq, 86-p. (1:1). Ən-Nəsiri, 87 (1:2). Teze, 90+5 (2:2).
Vərəqələr: Verman, 27. Navas, 36. Losano, 90+1. Bade, 90+7. De Yonq, 90+8 – sarı.
Hakim: Daniele Orsato (İtaliya).
3 oktyabr. Eyndhoven. 34206 tamaşaçı.
oyunun statistikası
29 (7) qapıya (“çərçivə”yə) zərbə 10 (2)
8 künc zərbəsi 4
3 ofsayd 2
11 qayda pozuntusu 9
3 (0) sarı (qırmızı) vərəqə 2 (0)
59 topa sahibolma (faizlə) 41

Qrupun digər oyununda PSV ilə “Sevilya” qalibi müəyyənləşdirə bilmədi. PSV Lanqla Bakayokonun saysız-hesabsız mərkəzə çəkilməsi ilə istədiyinə nail olmağa çalışdısa, “2 nömrə” kimi oynayan “Sevilya” Benitesin qapısı önündə nadir hallarda göründü. Əndəlüslərdən Okamposun iti bucaq altından qapıya düşmək cəhdi yadda qaldı. PSV-dən Ramalyonun vurduğu qol ofsayd üzündən sayılmadı. Fasilədən sonra komandaların qol vəziyyətindən yararlanmaq əmsalı artdı. Həm meydan sahibləri, həm də qonaqlar standart vəziyyətlərdən bacarıqla yararlandı. “Sevilya” kornerin ardından Qudelin zərbəsi ilə irəli çıxdı. Əsas vaxt başa çatmaq üzrə olarkən 1 dəqiqə (!) intervalla De Yonq penaltini qola çevirdi və Ən-Nəsiri Xuanlunun ötürməsini başla tamamladı. Nəhayət, artıq uzatma dəqiqələrində rəqibin cərimə meydançasına şığıyan Teze PSV-ni məğlubiyyətdən qurtardı. PSV ÇL-də son 14 oyunda, “Sevilya” isə avrokuboklarda son 14 səfər oyununda qalib gələ bilməyib.

1. Lans 2 1 1 0 3-2 4
2. Arsenal 2 1 0 1 5-2 3
3. Sevilya 2 0 2 0 3-3 2
4. PSV 2 0 1 1 2-6 1
24 oktyabr: Sevilya – Arsenal, Lans – PSV.

Oyundan sonra...
Mikel Arteta, “Arsenal”ın baş məşqçisi: “Lans” çox yaxşı komanda, səviyyəli rəqibdi. Hesabı açsaq da, rəqib yeganə imkandan yararlanıb onu bərabərləşdirdi. Fasilədən dərhal sonra fərqlənmək imkanımız oldu. Doğrudu, hücumda yetərincə kəsərli deyildik. İmkanları qaçırmaq bir yana, həm də yaxşı müdafiə oluna bilmədik. Sakanın zədəsinə gəlincə, daban nahiyəsində ağrı hiss etdi, oyunu davam etdirə bilmədi”.

Kevin Danso, “Lans”ın müdafiəçisi: “Azarkeşlərimiz önündə bütün gücümüzü qoyduq. Çətin oyun idi, “Arsenal” çox yaxşı oynadı, bizi dərindən müdafiə olunmağa məcbur etdi. Ancaq müdafiədə dözdük və konsentrasiyanı qoruduq. Xoşbəxtlikdən bu oyunda qələbə qazandıq”.

Lük de Yonq, PSV-nin müdafiəçisi: “Oyuna tam halında baxsaq, düşünürəm ki, topa biz daha çox nəzarət etdik, rəqibin də yaxşı imkanları oldu. Son nəticədə qazanılan 1 xaldan razıyıq, axı hesabı uzatma dəqiqələrində bərabərləşdirdik. Ancaq düşünürəm ki, daha yaxşı oynaya və qələbə qazana bilərdik”.

Xose Luis Mendilibar, “Sevilya”nın baş məşqçisi: “Dözmək lazım gələndə dözdük. İlk yarı çox çətin keçdi, hərçənd rəqib aşkar qol vəziyyətləri yaratmadı. 2-ci hissədə oyun daha açıq xarakter aldı, bizim də imkanlarımız yarandı. Qələbəni əldən verdiyimizə görə evə bir qədər parçalanmış və məyus halda qayıdırıq”.