"Əvvəllər demişdim, yenə təkrarlayıram. "Sabah" pis komanda deyil, heyətində də yetərincə yaxşı oyunçular var. Sadəcə, Kaşukla Mikels kimi aparıcı oyunçuların getməsi və "Partizan"a səfərdə uduzması komanda daxilində çöküş yaratdı. Əslində Masazır təmsilçisi Serbiya klubu ilə oyunda qələbəyə çox ümidliydi, sadəcə, bəxti gətirmədi. Bundan sonra da çempionatda ardıcıl məğlubiyyətlər, qırmızı vərəqələr ruh düşkünlüyü yaratdı. Amma fikir versək, görərik ki, məğlub olduğu oyunlarda belə, "Sabah" pis futbol sərgiləmirdi. Sadəcə, son nöqtəni qoya bilmirdilər. "Sumqayıt" üzərində qələbə klub üçün vacib dönüş nöqtəsi oldu. "Bayquşlar"ın hesabda geridə olmasına rəğmən, xarakter göstərib, geridönüş etməklə 3:1 qalib gəlməsi təqdirəlayiq haldı. Bu zəfər həm də "kimyaçılar"la təxirə salınan və sabah Sumqayıtda keçiriləcək qarşılaşma ərəfəsində də psixoloji üstünlük deməkdi. Murad Musayevin komandası səfərdə də "Sumqayıt"ı məğlub etsə, xalını 13-ə çatdırmaqla 7-ci pilləyə yüksəlir. Bundan sonra isə uğurun davamının gələcəyini düşünürəm. Bu mövsümün əvvəlki çempionatlardan fərqi odu ki, rəqabət güclü olduğundan, hansı komandanın əvvəlcədən qələbə qazanacağını demək mümkünsüzdü. Amma "Sabah" futbolçuları son oyundan sonra çox sevincliydilər, bu əhval-ruhiyəsini qorumağa çalışacaqlar. Həmçinin bir məsələyə də toxunmaq istəyirəm. Təbii ki, futbol emosiyalar oyunudu, bunu anlayırıq. Amma hələ çempionatımızda bir dövrə geridə qalıb, "Sabah"ın baş məşqçisi və məşqçiləri qırmızı vərəqə almaqla diqqət mərkəzinə düşür. Hər bir məşqçi fərqli xarakterə sahibdi. Eləsi var səbirli, təmkinlidi, eləsi var çılğındı. Lakin istənilən halda hisslərini boğmağa çalışmalıdılar. Məşqçi personalının tez-tez cəzalı duruma düşməsi xoş hal deyil və komandaya təsir edir".