"Partizan"la cavab oyunundan sonra “Sabah”da ruh düşkünlüyü və oyun planında sönüklük hiss olunur. Ardıcıl uğursuzluqlar da komandanın vəziyyətini çətinləşdirib. Bu durumda çıxış yolu baş məşqçi ilə təcrübəli futbolçuların üzərinə düşür. Onlar gərək başqalarına vəziyyəti izah etsin və birləşib qara zolaqdan çıxarsınlar. Bundan başqa, Kaşuk və Mikels kimi futbolçuların getməsi də təsirsiz ötüşmədi. Hər iki oyunçu komandanın oyun ansamblında əsas dirijorlar idi. Böyük ümidlərlə transfer olunan Till ilə Marqarita hələ ki onların yerini doldurmur. Görünür, komandaya hələ tam uyğunlaşa bilməyiblər. Düşünürəm ki, qarşıdakı turlarda "Sabah" toparlanacaq".

"Çoxları, o cümlədən mən də gözləyirdim ki, "Sabah" bu mövsüm çempionluğa oynayacaq və maksimum az oyunda büdrəcəyəcək. Amma son 3 turda gördüyümüz odu ki, Masazır təmsilçisi Konfrans Liqasında "Partizan"la cavab oyunundan sonra özünə gələ bilmir, uğursuzluqlar davam edir. Fikrimcə, "Sabah"ın ardıcıl məğlubiyyətlərinin iki səbəbi var. Birincisi, Kaşukla Mikelsin getməsi komandanın oyun planını xeyli zəiflədib. Çünki ukraynalı universal futbolçu kimi həm qollar vurur, həm hücumları qurur, həm də digər futbolçularla yaxşı əlaqə qururdu. Qısası komandanın düşünən beyni, onurğa sütunu idi. Mikels də cinahda sürəti, texnikası, keçidləriyə rəqib müdadiəsini və qapıçını daim təzyiq altında saxlamağı bacarırdı. Bu futbolçuların yeri doldurulmayıb. Yeni futbolçular nəinki onları əvəz etmir, heç komandaya da doğru-dürüst uyğunlaşmayıblar. Düşünürəm ki, əlavə transferlərə də ehtiyac var. İkincisi, komandada "Partizan"la oyundan sonra ruh düşkünlüyü var idi. Çempionatda ardıcıl məğlubiyyətlər vəziyyəti daha da çətinləşdirib. Bunun nəticəsidi ki, "bayquşlar"ın oyun planında da tənəzzül var. Arxa xətdə sistemli, intizamlı müdafiə, demək olar, yoxdu. İrəlidə futbolçular qol imkanları yarada bilmir, fürsətlər də yaxalayan son nöqtəni qoya bilmir. Qısas komadanın mənəvi-psixoloji vəziyyətini zəifliyi futbolçular arasında xətlərarası əlaqəni və oyun planını aradan qaldırıb. "Sabah" millimizin oyunu ilə bağlı yaranan fasilədən maksimum istifadə edərək toparlanmalıdı. 6-cı turda komanda mütləq qələbə qazanmalıdı. Yoxsa böhran daha da dərinləşəcək".

"Sabah"da tənnəzzül olduğunu deməzdim. Sadəcə, bəxtsizlikdən əziyyət çəkirik. "Partizan"la cavab görüşü ilə yanaşı, sonrakı 3 çempionat oyununu da nəzərə alsaq, oyun planında pis çıxış etmirik. "Neftçi" və "Zirə" oyunlarda qol imkanlarımız çox oldu, amma yararlana bilmədik. Hətta dirəkdən qayıdan topumuz da var idi. Tovuzlularla oyunda ilk qolu gözlənilmədən buraxdıq. Rəqibin belə fərqlənəcəyi ağlımıza da gəlməzdi. Qoldan sonra toparlana bilmədik və nəticədə daha iki qol gördük. İndi deyəcəklərim uğursuzluğumuza haqq qazandırmır. Amma vurğulayım ki, Kaşukla Mikelsun sıralarımızı tərk etməsi bizim üçün böyük itki oldu. Onlar əsas qol silahımız idi. Eləcə də hücumçumuz Apeh zədədən əziyyət çəkir. Yeni cəlb olunan oyunçular hələ komandaya tam uyğunlaşa bilməyib. Buna rəğmən, nikbinik. İnanıram ki, qarşıdakı oyunlarda toparlanacağıq".