Ferstappen karyerasını harda davam etdirəcək?
“Red Bull”un pilotu Maks Ferstappen bildirib ki, “Formula-1”də karyerasını bitirəndən sonra gücünü GT çempionatındakı yarışlarda sınamaq istəyərdi:
“Valentino Rossi kimi hərəkət etmək möhtəşəm olardı. Onun GT çempionatındakı yarışlarını izləmək xoşuma gəlir. Bizim də maşınımız var. O, “MotoGP” seriyasında bacardığı hər şeyi etdi, möhtəşəm karyera qurdu, indi isə inadkarcasına çalıçmaqla, yenidən qələbə qazanmağa arzulamaqla yanaşı, şənlənir. Düşünürəm ki, mən də gələcəklə bağlı belə bir variant axtarıram”.
Bu arada Ferstappenlə bağlı başqa bir maraqlı xəbər də yayılıb. “F1-Insider” iddia edir ki, idman məsələləri üzrə məsləhətçi Helmut Marko “Red Bull”dan gedəcəyi təqdirdə niderlandlı üçqat dünya çempionu da komandadan ayrılacaq. Adı çəkilən qaynağa inansaq, “Red Bull”un rəhbəri Kristian Horner Markonun getməsini istəyir. Ferstappen isə Hornerə bildirib ki, bu halda mən də gedəcəm.
Xatırladaq ki, Ferstappen 3-cü dünya çempionluğunu bir neçə gün əvvəl – Qətər mərhələsinin sprint yarışında rəsmiləşdirib. 26 yaşlı pilot 2021 və 2022-ci illərdə də hamını qabaqlayıb.
Digər xəbərlər
