''Mançester Yunayted'' və İngiltərə futbolu tarixinin gəlmiş-getmiş ən yaxşı, ən sevilən oyunçularından hesab olunan ser Bobbi Çarlton dünən 86 yaşında dünyasını dəyişdi.

"Football-plus.az" xəbər verir ki, ''Yunayted''in paylaşımında ''kəlimələr heç vaxt yetərli olmayacaq'' ifadəsinə yer verildi. Çarlton 17 il (1956-73) manikunianların şərəfini qoruyub. 758 oyuna 249 qol vuran və az qala yarım əsr klub tarixinin ən məhsuldar oyunçusu statusunda olan Çarltonun rekordunu 2017-də Ueyn Runi yeniləmişdi. ''Qırmızı şeytanlar''ın o dönəmdə Avropa nəhəngi sayılmamasına rəğmən bu komanda ilə həm İngiltərə çempionluğunu, həm də Çempionlar Kubokunu qazanmağa müvəffəq olan Çarlton DC-1966-nın qalibi olan İngiltərə yığmasının əfsanəvi heyətinin də önəmli bir parçası idi. O, yığmada 106 oyuna 49 qol vurmuşdu və bu rekordu da Runi yalnız 2015-də yeniləmişdi. 2020-ci ilin noyabrında Çarltona demensiya diaqnozu qoyulmuşdu. Onun 2020-nin iyulunda dünyasını dəyişən qardaşı Cek də eyni xəstəlikdən əziyyət çəkirdi. Onu da bildirək ki, Bobbi Çarltonun aramızdan ayrılması ilə birlikdə DÇ-66-nın qalibi olmuş komandadan həyatda qalan cəmi bir nəfər qalıb. Bu, həmin turnirin finalında Almaniyanın qapısına 3 dəfə yol tapan ser Ceff Herstdi. Dekabrda onun 82 yaşı tamam olacaq.

ƏLİ