Yaxın keçmişin dünya ulduzu Ueyn Runinin 12 yaşlı oğlu adından söz etdirməyi bacarıb.

''Mançester Yunayted''in U-12 komandasında forma geyən Kai Runi indidən sərgilədiyi performansla atasının davamçısı ola biləcəyini göstərib. İnanılmaz istedada malik olan bu yeniyetmə 2021/22 mövsümünü ''Yunayted''in U-12 komandasında 56 qol və 28 məhsuldar ötürmə ilə tamamlayıb! O ilk dəfə ötən ilin oktyabrında ''Liverpul'' ilə oyunda 4 qol vurmaqla diqqət çəkməyi bacarmışdı.

Ueyn Runinin özü də artıq 17 yaşda 30 milyon avroya ''Everton''dan ''Yunayted''ə keçdiyini xatırladaq. Hazırda ''Derbi''nin baş məşqçisi vəzifəsini icra edən Runi 253 qolla ''Yunayted'', 53 qolla İngiltərə yığması tarixinin ən məhsuldar oyunçusu statusundadı.