Azər Məmmədov: “Mövcud heyətlə davam edəcəyik”
“Kəpəz” Misli premyer-liqasının 9-cu turundan sonra 1 qələbə, 2 heç-heçə, 6 məğlubiyyətlə turnir cədvəlinin sonuncu – 10-cu sırasındadı. “Sarı-göylər” vurduğu 5 qolun qarşılığında 13 dəfə “çərçivə”ni qoruya bilməyib. Bu statistika qapıçı mövqeyində çatışmazlıq olduğunu göstərir. Baş məşqçi Azər Məmmədov problemi aradan qaldırmaq üçün heyəti daha bir qapıçıyla gücləndirib. Yeni transferin portuqaliyalı İqor Rodriges olduğunu xəbər vermişdik. Beləliklə, Gəncə təsmilçisinin 4 qapıçısı var.
Yeni qolkiperin gəlişindən sonra mətbuatda bu mövzuda xəbərlər tirajlandı. İddialara inansaq, klub belaruslu Vladislav Vasilyuçeklə yolları ayıracaq. Məlumatın səhih olub-olmadığını öyrənmək məqsədilə “Kəpəz”in baş məşqçisi Azər Məmmədovla əlaqə saxladıq. Çalışdırıcı qəzetimizə açıqlamasında dedi ki, bilgilər həqiqəti əks etdirmir:
“Bu haqda mətbuatdan oxumuşam. Təəssüf ki, məsələni aydınlaşdırmadan nə gəldi yazırlar. Kimisə yola salmaq fikrimiz yoxdu. Məqsəd qapıçı möqveyini gücləndirməkdi ki, bu premyer-liqada qalmaq üçün çox vacibdi. “Çərçivə”nin önəmi bəllidi. Orda boşluq olsa, vurulan qolların mənası qalmır. Rəqabəti gücləndirmək üçün belə etdik. Hər birini sınaqdan keçirəcəyik. Özünü yaxşı tərəfdən göstərən, ümidlərimizi doğruldan qapıçı daha çox şans qazanacaq. Qış fasiləsinə qədər mövcud heyətlə davam edəcəyik. Yalnız fasilədə ehtiyac yaranarsa, bəzi dəyişikliklər olacaq”.
Maraqlıdı ki, hazırda ən çox qapıçısı olan komanda “Kəpəz”di. Azarkeşlər klub büdcəsinin azlığı fonunda 4 qolkiperə ehtiyac olmadığını düşünür. Biz isə hələlik “xeyirli olsun” deyib başqa mövzuya keçək. Komandanın durumunu nəzərə alsaq, millinin oyunlarıyla bağlı fasilədə “sarı-göylər”in yoxlama oyunu keçirməsi gözlənilirdi. Lakin alınmadı. Azər Məmmədovdan bunun da səbəbini açıqladı:
“Əslində planda var idi. Həm biz tərəfdən, həm də bəzi klublardan təkliflər oldu. Oyunların vaxtı və məkanı mövzusunda anlaşa bilmədik. Buna baxmayaraq, əlimizdən gələni etmişik. Məşqlər çox yaxşı keçir. Hər gün çalışırıq”.
Baş məşqçi açıqlamaq istəməsə də, araşdırmalarımız zamanı məlum oldu ki, “Sumqayıt” “Kəpəz”lə yoldaşlıq oyunu keçirmək istəyib. Lakin gəncəlilər məsafənin uzaqlığı üzündən bununla razılaşmayıb. “Sarı-göylər”in təklifini isə “Qəbələ” geri çevirib. Bunun səbəbi “qırmızı-qaralar”ın sıx qrafikdə məşq etməsidi.
KƏNAN BAHADIR
