“Kəpəz”in yeni hücumçusu sabah Bakıda olacaq
“Kəpəz”də heyətin komplektləşdirilməsi prosesi başa çatmaq üzrədi. Daha öncə “sarı-göylər”in hücumçu axtarışında olduğunu dəfələrlə diqqətinizə çatdırmışdıq. Gəncə təmsilçisi, nəhayət, istəyinə nail olub.
Bu haqda "Football-plus.az"a komandanın baş məşqçisi Azər Məmmədov məlumat verdi. Çalışdırıcı uyğun futbolçuyla anlaşdıqlarını dedi. Onun söylədiklərinə keçid alaq:
“Afrikalı futbolçu Adame Niane ilə razılığa gəldik. Bilirsiz ki, “transfer pəncərəsi” bağlanıb və sadəcə, azad agentlərlə müqavilə bağlamaq mümkündü. Araşdırmalarımız zamanı hücumçu mövqeyinə ən uyğun oyunçunun Niane olduğunu gördük. Düzü, onunla uzun müddət idi danışıq aparırdıq. Lakin futbolçu Vyetnam klubundan da təklif almışdı. O vaxtkı söhbətimizin sonunda həmin komandaya transfer ediləcəyini deyib bizimlə müzakirələri dayandırdı. Bu yaxınlarda isə özü yenidən bizimlə əlaqə saxladı. Sən demə, Vyetnam klubu əvvəlcədən söz verdiyi pulu verməkdən imtina edib. Təklifimizin hələ də keçərli olub-olmadığını soruşdu. Biz də razılaşdıq. Düzdü, ilkin mərhələdə viza problemi yaşandığından gecikmə oldu. Amma şükür, problem artır aradan qaldırılıb. Biletini də almışıq. İnşallah, sentyabrın 29-da Bakıya gələcək”.
“Kəpəz”in baş məşqçisi bu futbolçunun sonuncu transfer olduğunu diqqətə çatdırdı:
“Bundan sonra yeni futbolçu transfer etmək niyyətimiz yoxdu. Hətta maliyyə gücümüz artsa belə, yola bu heyətlə davam edəcəyik. Məcburiyyət yaranmadıqca ümumi komanda ruhunu dəyişmək istəmirəm”.
Qeyd edək ki, Adame Mali əsillidi və vaxtilə ölkəsinin millisində çıxış edib. Məşhur “transfermarkt” portalı hücumçunu 350 min avro civarında qiymətləndirir. Onun sonuncu klubu İran təmsilçisi “Nassaci Mazandaran” olub. Xatırladaq ki, Azər Məmmədov daha öncə qapıçı İqor Rodrigeslə anlaşdıqlarını da qəzetimizə açıqlamışdı.
KƏNAN BAHADIR
Digər xəbərlər
