Yaxın Şərqdə vəziyyətin yenidən pisləşməsi əksər sahələrdə olduğu kimi futbola da mənfi təsir edir.

“Football-plus.az” xəbər verir ki, bilindiyi kimi, artıq HƏMAS-İsrail müharibəsinə görə bu bölgədə idman tədbirlərinin keçirilməsi dayandırılıb.

İsrail yığmasının AÇ-2024-ün seçmə turnirində İsveçrə və Kosovo ilə bu ay keçirilməli olan oyuNları təxirə salınıb. Çətin vəziyyətə düşən Fələstin isə Əlcəzairdən dəstək alıb. Fələstin yığması ev oyunlarını Afrikanın bu ölkəsində keçirəcək. Bu məlumatı Əlcəzair Futbol Federasiyası yayıb. Məlumatda Fələstin Futbol Federasiyasının (FFF) prezidenti Cibril Racubun xahişi ilə DÇ-2026 və Asiya Kuboku-2027-nin seçmə oyunlarına hazırlıq çərçivəsində bütün rəsmi və qeyri-rəsmi oyunların Əlcəzairdə keçiriləcəyi bildirilib. Əlcəzair həmçinin oyunların təşkili ilə bağlı bütün xərcləri ödəyəcək.
Qeyd edək ki, Fələstin yığması DÇ-2026-nın seçmə turnirində mübarizəyə 2-ci mərhələdən başlayacaq. Komanda ilk oyununu noyabrın 21-də evdə Avstraliyaya qarşı keçirməlidi. Bu matça Əlcəzairin hansı şəhərinin evsahibliyi edəcəyinə hələ aydınlıq gəlməyib.

İtkin düşdü, ölü tapıldı...
Bir neçə gün əvvəl itkin düşdüyü haqda məlumat verilən futbolçu ilə bağlı üzücü xəbər yayılıb. “Kordova”nın 18 yaşlı oyunçusu Alvaro Prietonun cəsədi tapılıb.

İspaniya mənbələrinin məlumatına görə, onun cəsədi Sevilyadakı Santa Xusta stansiyasında qatarın iki vaqonu arasında tapılıb. Yeniyetməni reportyor Alberto Katalan səhər saatlarında aşkar edib. “Kordova”nın baş direktoru Antonio Monterrubio məyusedici faktla bağlı belə deyib: “Futbolçumuz Alvaro Prietonun ölü tapılmasına təəssüflənirik. Klub onun ailəsinin istəyinə uyğun olaraq yalnız rəsmi açıqlama ilə kifayətlənəcək. Alvaronun ailəsinə, dostlarına və komanda yoldaşlarına başsağlığı veririk. Onlar bizim dəstəyimizi hiss edir və edəcəklər. Klubumuz adından hər kəsə bu çətin günlərdə məlum vəziyyətə anlayışla yanaşdıqlarına və göstərdiyi münasibətinə görə təşəkkür edirik. Rahat yat, Alvaro”.

Qeyd edək ki, daha əvvəl mətbuatda Prietonun sonuncu dəfə Sevilyadakı Santa Xusta stansiyasında göründüyü barədə məlumat yayılmışdı. Bundan sonra futbolçu ilə əlaqə kəsilmişdi. Alvaronu sonuncu dəfə görənlərin dəmiryol vağzalı işçiləri olduğu bildirilmişdi. Onlar bir neçə yeraltı tuneldən keçərək relslərin üstünə çıxmaq istəyərkən futbolçudan stansiyanı tərk etməsini tələb etmişdilər.