Bir müddət öncə Rusiya mətbuatında “Zenit”in Bakıda “Neftçi” ilə yoldaşlıq oyunu keçirəcəyi ilə bağlı xəbər dərc olunmuşdu.

Orda bildirilirdi ki, oyun noyabrda - milli komandalar üçün yaranacaq fasilədə baş tutacaq. Həmin vaxt klubun Media, Marketinq və İctimaiyyətlə Əlaqələr Departamentinin rəhbəri Rüstəm Allahverdiyev qəzetimizə açıqlamasında görüşün keçiriləcəyini təsdiqləmişdi. Lakin onun yeri və başlama saatı ilə bağlı hansısa informasiya verməmişdi.

Maraq üçün bildirək ki, oktyabrın 14-də Qazaxıstanda “Kayrat”la “Zenit” üz-üzə gəldi. Qarşılaşma 2:2 hesabı ilə başa çatdı. İndi növbə “Neftçi” – “Zenit” matçınındı. Görəsən, oyun nə zaman keçiriləcək? Yeri və başlama vaxtı bəllidi? Suallarımızı “ağ-qaralar”ın mətbuat katibi Emin Əfəndiyə ünvanladıq. Klub rəsmisi məsələ ilə bağlı bunları söylədi: “Dünən bu məsələ ilə bağlı Rusiyanın “Sport-Ekspress” nəşri də bizimlə əlaqə saxlamışdı. Oyunun noyabrda keçirilməsi ilə bağlı şifahi razılıq əldə etmişik. Bizə sərf edən günlərin qrafikini “Zenit”ə göndərmişik. Onlar seçim etməlidilər. Bundan sonra bizə müqavilə göndərməlidilər. Yəni top rusiyalıların tərəfindədi. “Zenit”in gün seçimini gözləyirik. Məlumat gələn kimi ictimaiyyətə bununla bağlı informasiya verəcəyik. Oyunun harda keçiriləcəyinə gəlincə, bizim stadionumuz “Neftçi Arena”dı. Çox güman, qarşılaşma burda da keçiriləcək. “Neftçi Arena” bizim üçün çox rahatdı. Çünki öz evimizdi. Burda oynamaq “Neftçi”yə daha çox sərf edir”.

İLKİN SULTANLI