Fransa Niderland üzərindəki səfər qələbəsi sayəsində AÇ-nin final mərhələsinə vaxtından əvvəl vəsiqə qazandı.

"Football-plus.az" xəbər verir ki, Deşamın komandası oyuna fəal başladı və Mbappe hesabı erkən açdı. Hesabda önə keçən qonaqlar uzun müddət oyunun axarına nəzarət etdi. “Narıncılar” isə yalnız ilk yarının ortalarında silkələndilər və Menyanın qapısına doğru bir neçə perspektivli hücum qurdular. Düzdü, bu hücumlar heç bir nəticə vermədi. Əvəzində qonaqlar 2-ci hissənin əvvəlində fərqi artırdılar. Mbappe 17 metrdən gözəl zərbə ilə dublunu rəsmiləşdirdi. Kumanın komandası yalnız oyunun son bölümündə intriqanı bərpa edə bildi. “Feyenoord”un müdafiəçisi Hartman milli komandadakı debüt oyununda fərqləndi. Maraqlıdı ki, bu, Fransanın cari seçmə mərhələdə buraxdığı ilk qol idi. Ancaq “narıncılar” geridönüş edə və məğlubiyyətdən qaça bilmədi. Bu məğlubiyyətdən sonra 3-cü pilləyə düşən Niderland Yunanıstanı da özündən irəli buraxdı. Düzdü, Kumanın komandasının ehtiyatda bir oyunu var. Dünən axşam isə 2-ci yer uğrunda mübarizə aparan bu komandalar Afinada qarşılaşdı.

Qrupun digər oyununda Yunanıstan İrlandiyanın AÇ-yə yollanmaqla bağlı azacıq ümidlərinin də üstündən xətt çəkdi. Halbuki meydan sahibləri oyuna daha yaxşı başladı və iki dəfə hesabı açmağa yaxın oldu. Smollbounun zərbəsinin qarşısını Vlahodimos, Ferqyusonun zərbəsinin qarşısını isə dirək aldı. Yunanlar 20-ci dəqiqədə hesabı açdı. Simikasın asmasından sonra Yakumakis baş zərbəsi ilə fərqləndi. Stiven Kenninin komandası hesabı bərabərləşdirmək üçün irəli atıldı. Ancaq daha təcrübəli qonaqlar hissənin sonunda rəqibi növbəti dəfə cəzalandırdı. Sürətli əks-hücumu Masuras dəqiq zərbə ilə bitirdi. 2-ci hissəsə İrlandiyanın fərqi azaltmaq üçün bir neçə şansı oldu, ancaq Vlahodimos etibarlı oynadı. Bununla da İrlandiya 2-ci yeri tutmaqla bağlı nəzəri şansını da itirdi. Bu komanda son üç oyunun hamısında qələbə qazansa belə, şəxsi oyunların nəticəsinə görə həm Yunanıstandan, həm də Niderlanddan geri qalacaq.

B qrupu, 7-ci tur
Niderland – Fransa 1:2 (0:1)
Niderland: Verbrüggen, Ake (Van de Ven, 80), Van Diyk, Gertryoyda, Hartman, Verman, De Roon (Viffer, 46), Dumfris (Frimponq, 62), Simons (Berqveyn, 80), Reynders, Veqhorst (Malen, 38).
Fransa: Menyan, T.Ernandes, L.Ernandes, Konate, Kloss (Hüsto, 80), Rabyo, Çuameni, Koman (Jiru, 71), Kolo Muani (Türam, 80), Qrizmann (Fofana, 87), Mbappe.
Qollar: Mbappe, 7 (0:1). Mbappe, 53 (0:2). Hartman, 83 (1:2).
Vərəqələr: Verman, 29. Dumfris, 51. Çuameni, 90+4. Mbappe, 90+6 – sarı.
Hakim: Feliks Svayer (Almaniya).
13 oktyabr. Amsterdam. 51310 tamaşaçı.
İrlandiya – Yunanıstan 0:2 (0:2)
İrlandiya: Bazunu, Doherti, Kollinz (Menninq, 46), Daffi, Skeylz, Braun (Conston, 70), Kallen, Oqbene (Ayda, 85), Smollboun (Robinson, 70), Nayt, Ferqyuson.
Yunanıstan: Vlahodimos, Rota, Mavropanos, Retsos, Simikas, Bakasetas (Siopis, 88), Kurbelis (Buhalakis, 64), Mantalos, Masuras (Kulyerakis, 88), Yakumakis (İoannidis, 70), Pelkas (Hatsivoyanis, 64).
Qollar: Yakumakis, 20 (0:1). Masuras, 45+4 (0:2).
Vərəqələr: Smollboun, 10. Pelkas, 56. Buhalakis, 75 – sarı.
Hakim: Qlenn Nüberq (İsveç).
13 oktyabr. Dublin. 41239 tamaşaçı.
8-сi tur
Cəbəllütariq – İrlandiya ???
Yunanıstan – Niderland ???
1. Fransa 6 6 0 0 13-1 18
2. Yunanıstan 6 4 0 2 12-5 12
3. Niderland 5 3 0 2 9-7 9
4. İrlandiya 6 1 0 5 5-9 3
5. Cəbəllütariq 5 0 0 5 0-17 0

Oyundan sonra
Didye Deşam, Fransa yığmasının baş məşqçisi: “Mbappe daim bugünkü kimi oynasa, Fransanın qələbə şansı çox artır. Ona görə sevinirik, xüsusən də son vaxtlar yaşadığını nəzərə alsaq. Kilian meydanda fərq yaradır. Rəqibin müdafiəçiləri ondan qorxurdular. Mən hətta onun boşluq yarananda sağ cinahda oynadığını da gördüm, bu kapitan üçün vacib cəhətdi. O, çox şeyi öz üzərinə götürür. Bilirəm ki, bəziləri Mbappenin media ilə tez-tez ünsiyyətdə olmasını istəyir, ancaq onun əvəzinə ayaqlarının danışması daha çox xoşuma gəlir”.

Ticani Raynders, Niderland yığmasının yarımmüadafiəçisi: “Düşünürəm ki, yaxşı oynadıq. Topla yaxşı davrandıq, qol vəziyyətləri yaratdıq. Heyf ki, 2-ci qolu vura bilmədik. Fransa ilə heç-heçə yaxşı nəticə olardı. Təəssüf ki, bu baş vermədi”.

Fakt
Mbappe Fransa yığmasında qol sayına görə yalnız üç futbolçudan geri qalır. Niderlandla oyunda qol sayını 42-yə çatdıran forvard Mişel Platinini arxada qoydu. Onu yalnız Antuan Qrizmann (44), Tyerri Anri (51) və Olivye Jiru (54) qabaqlayır.