Şahruddin Məhəmmədəliyev – 5,5
Nəzərə alsaq ki, avstriyalıların oyunboyu qapıya cəmi üç dəqiq zərbəsi oldu, dünən Şahruddinin üzərinə düşən yük nisbətən yüngül idi. Gərgin keçən oyunun taleyini penalti zərbəsi həll etdi. Şahruddin zərbəni qaytarmağa yaxın olsa da, uğurlu ola bilmədi. Ümumilikdə ciddi səhvlərlə yadda qalmayan qapıçını məğlubiyyətdə günahlandırmaq olmaz.

Anton Krivotsyuk – 5,0
Müdafiəçi oyuna pis başlamamışdı. Xüsusilə ilk hissədə əksər hava mübarizələrindən qalib ayrılmağı bacarırdı. Qapımızda qol görəndən sonra başqa oyunçular kimi, Anton da səhvə yol verməyə başladı.

Höccət Haqverdi – 4,0
De Byazi dünən də müdafiənin mərkəzini Höccətə etibar etmişdi. Oyunboyu rəqib cərimə meydançamız daxilində bir neçə real qol imkanı qazandı. Höccət bu epizodların heç birində inamlı təsir bağışlamadı.

Rahil Məmmədov – 4,5
Penalti epizoduna qədər Rahil yığmanın meydandakı ən yaxşı oyunçusu idi. Təəssüf ki, rəqib cərimə zərbəsini yerinə yetirən zaman qeyri-peşəkar davranaraq qolun vurulmasında səbəbkar oldu. Ötən oyun komandamıza penalti qazandıran müdafiəçi bu dəfə antiqəhrəmana çevrildi.

Elvin Cəfərquliyev – 4,0
İlk yarıda hücumlara fəal dəstək verən Elvinin əksər ötürmələri qeyri-dəqiq alınırdı. Cinahdan komandamızın hücumlarını qurmağa cavabdeh olan futbolçu ikinci hissədə çox passiv idi. Qarşılaşmanın sonuna yaxın Qismət Alıyevlə əvəzlənməsi də bunun nəticəsidi.

Aleksey İsayev – 5,0
Estoniya ilə oyunda olduğu kimi, dünən də xüsusi heç nə ilə yadda qala bilməyən Alekseyi De Byazi gec də olsa, Mahir Emreliylə əvəzlədi. Futbolçunun bəzi ara ötürmələri uğurlu alınsa da, hücumçularımız sonluğu gətirə bilmədilər.

Coşqun Diniyev – 3,0
Oyunun əvvəllərindən ikili mübarizələri uduzan Coşqunun fiziki hazırlığının Avstriya ilə oyun üçün kifayət etmədiyini gördük. Bəzi epizodlarda isə topla artıq hərəkət edib itirməsi komandamıza baha başa gələ bilərdi. Təsadüfi deyil ki, baş məşqçi ikinci hissədə onu gənc Emil Səfərovla əvəzlədi.

Toral Bayramov – 4,5
Toral ilk dəqiqələrdən həyəcanlı görünsə də, zamanla toparlanıb yaxşı oyun göstərməyə başladı. Sağ cinahda uğurlu keçidlər edərək rəqib müdafiəsinə təhlükələr yarada bilirdi. İkinci hissənin əvvəllərində qapıya endirdiyi dəqiq zərbə effektli alınmasa da, yığmanın yaratdığı yaddaqalan epizodlardan biri idi. Son dəqiqələrdə qaçırdığı yüzfaizlik qol imkanı isə futbolçu haqqındakı bütün müsbət fikirləri yerə vurdu.

Emin Mahmudov – 4,5
Kapitanın dünənki vəzifəsi hücumdakı duetə ötürmələr verərək qol vəziyyətləri yaratmaq idi. Emin isə ilk dəqiqələrdən çox passiv görünür, mübarizələri tez-tez uduzaraq top itkisinə yol verirdi. Bəzi ötürmələri təhlükə yaratsa da, hücum xəttinin etibarsızlığı nəticə qazanmağa imkan vermədi.

Emil Səfərov – 3,5
Gənc yarımmüdafiəçi meydana çıxanda komandamız məğlub vəziyyətdə olduğu üçün xaotik oyun göstərirdi. Yenə də Emil bəzi epizodlarda Coşqundan daha fəal və sürətli olduğunu göstərməyi bacardı. Toralın boşa verdiyi yüzfaizlik qol vəziyyətinin yaradıcılarından biri idi.

Ramil Şeydayev – 4,0
Oyunboyu, sadəcə, qaçan Ramil xeyli imkanı əldən verdi. Oyunun əvvəllərində rəqib müdafiəsini təzyiq altında saxlamaq məqsədi ilə pressinq tətbiq etsə də, sonradan bunu da unudub nizamsız oynamağa başladı. Oyunun sonlarında əsəblərini cilovlamağı bacarmayan futbolçu intizamsızlıq ucbatından sarı vərəqə ilə də cəzalandırıldı.

Renat Dadaşov – 3,0
Renat dünən zədələnənə qədər meydanda görünmürdü. Yalnız zədə epizodunda bir neçə dəqiqəliyə diqqət mərkəzində oldu. De Byazi Mahir Emrelini ehtiyatda saxlayaraq start heyətində Renata şans versə də, o, bu şansı dəyərləndirə bilmədi.

Mahir Emreli – qiymətsiz

Musa Qurbanlı – qiymətsiz

Qismət Alıyev – qiymətsiz

ADİL NƏHMƏTLİ