Artıq Libertadores Kubokunun (LK) 1/4 finalı arxada qalıb.

"Football-plus.az" xəbər verir ki, avqustun son, sentyabrın ilk günlərində bu mərhələnin cavab oyunları keçirildi. Bununla da Cənubi Amerikanın ən nüfuzlu klub turnirində yarımfinalçılar müəyyənləşdi.

1/4 finalda Braziliyanın 3, Argentinanın 2, Boliviya, Kolumbiya və Paraqvayın hərəyə 1 klubu çıxış edirdi. İlk oyunlar braziliyalıların möhtəşəm nəticəsi ilə daha çox yadda qalmışdı. Regionun ən böyük ölkəsini təmsil edən hər üç komanda qalib gəlmişdi. Cavab görüşləri də “sambaçılar”ı qane edən hesablarla nəticələndi. İki oyunun nəticəsinə əsasən, “İnternasyonal” “Bolivar”ı 3:0, “Palmeyras” “Deportivo Pereyra”nı 4:0, “Fluminense” isə “Olimpiya”nı 5:1 hesabıyla üstələdi. “Fluminense”nin hücumçusu Kano paraqvaylıların qapısına daha iki dəfə yol tapmaqla 9 qolla bombardirlərin yarışında vahid lider oldu.

Bu mərhələdə Argentina derbisinə maraq daha böyük idi. Olduqca gərgin keçən “Boka Xuniors” – “Rasinq” matçında hesab açılmamışdı. Cavab görüşünün əsas vaxtında da qapı torları silkələnmədi və reqlamentə görə, əsas vaxt sona çatan kimi penalti seriyası qaydası tətbiq edildi. “Lotereya”nın qalibi avelyanedalıları 4:1 hesabıyla üstələyən “Boka Xuniors” oldu.

Beləliklə, yarımfinalda Braziliyanın 3, Argentinanın 1 komandası çıxış edəcək. Bu mərhələnin sentyabrın 28-29-da keçiriləcək ilk oyunlarında “Fluminense” “İnternasyonal”ı, “Boka Xuniors” isə “Palmeyras”ı qəbul edəcək.

1/4 final, cavab oyunları
İnternasyonal (Braziliya) - Bolivar (Boliviya) 2:0 (ilk oyun – 1:0)
Valensiya, 11; 60.
Palmeyras (Braziliya) - Deportivo Pereyra (Kolumbiya) 0:0 (4:0)
Olimpiya (Paraqvay) - Fluminense (Braziliya) 1:3 (0:2)
Sabala, 44 – Con Kennedi, 24. Kano, 80; 90+1.
Rasinq (Argentina) - Boka Xuniors (Argentina) 0:0, p. – 1:4 (0:0)
Bombardirlər: Kano (Fluminense) - 9, Paulinyo (Atletiko Mineyro) - 7, Pabon (Atletiko Nasyonal) – 6, Artur (Palmeyras), Pons (İndependyente Medelyin) - 5.